GORANBOY RAYONUNDA UŞAQ VƏ AİLƏLƏRƏ DƏSTƏK MƏRKƏZİ AÇILMIŞDIR
Bu münasibətlə keçirilən mərasimi rayon icra hakimiyyətinin başçısı Novruz Novruzov açmış, Milli Məclisin deputatı Gültəkin Hacıyeva, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova çıxış etmişlər. Onlar xüsusi qayğıya ehtiyacı olan uşaqların cəmiyyətə inteqrasiyası üçün bu mərkəzin əhəmiyyətini vurğulamış, bu işə kömək göstərən təşkilatlara minnətdarlıqlarını bildirmişlər.
Amerika Birləşmiş Ştatlarının Azərbaycandakı səfiri Ann Ders qeyd etmişdir ki, ABŞ-ın Beynəlxalq İnkişaf Agentliyinin maliyyə dəstəyi ilə yaradılan bu mərkəzin əsas məqsədi xüsusi qayğıya ehtiyacı olan uşaq və ailələrə icma əsaslı alternativ dəstək xidmətləri göstərməkdir. Onun xidmətlərindən ancaq imkansız ailələrdən olan uşaq və gənclər, uşaq müəssisələrində yaşayan, sağlamlığı qeyri-normal olan, habelə qaçqın və məcburi köçkün uşaqlar faydalanacaqlar. Amerikalı diplomat həyata keçirilən bu layihənin gerçəkləşməsi üçün yerli təşkilatların da üzərinə böyük vəzifələr düşdüyünü bildirmiş və bu işdə onlara uğurlar arzulamışdır.
Mərasimdə mərkəzin balaca üzvlərinin çıxışlarından sonra rəmzi qırmızı lent kəsilmiş, səfir və bir sıra beynəlxalq təşkilatların nümayəndələri burada fəaliyyət göstərəcək “Açıq qapı”, “Əlaqələndirmə və informasiya”, “Ailə dəstək qrupu”, “Evlərə səfərlər”, “Aktiv terrapiya”, “Ana və uşaq qrupu”, “Uşaqlarla müsbət ünsiyyət”, “Uşaq və gənclər üçün həyat təlimi”, “Mədəni və əyləncəli tədbirlər” şöbələrində yaradılmış iş şəraiti ilə yaxından tanış olmuşlar. Mərasim Azərbaycan Dövlət Kukla Teatrı aktyorlarının iştirakı ilə göstərilən səhnəciklərlə başa çatmışdır.
