GÖYÇAYDA VERTOLYOT QƏZAYA UĞRAMIŞDIR
Göyçay Rayon Polis Şöbəsinin rəisi İmran Hüseynəliyevdən telefonla aldığımız məlumata görə vertolyot Göyçay şəhəri üzərində olarkən onun arxa hissəsi alovlanmışdır. Qəzadan xəbər tutan heyət vertolyotu şəhərdən kənara istiqamətləndirmiş, hətta fişəng atıb havanı işıqlandırmaqla maşını təhlükəsiz yerə endirməyə çalışmışdır. Buna baxmayaraq vertolyotun pəri yüksək gərginlikli elektrik ötürücü xəttin bir naqilini qıraraq şəhərin kənarındakı “Göyçaypetrol” yanacaqdoldurma məntəqəsinin təqribən 50-60 metrliyində boş sahəyə düşmüşdür. Rayon icra hakimiyyətinin, hüquq mühafizə orqanlarının rəhbərləri dərhal hadisə yerinə gəlmiş, yerli yanğınsöndürənlərin səyi nəticəsində yanğın təqribən 1 saat ərzində söndürülmüşdür.
İlkin araşdırmalar zamanı heyətin 4 üzvünün vertolyotun kabinəsində yanmış cəsədi müəyyən edilmişdir. Yerli əhalidən zərərçəkən olmamışdır, şəxsi əmlaka və dövlət əmlakına ziyan dəyməmişdir.
Vertolyotun hansı quruma məxsusluğu, haradan gəlib haraya getdiyini hələlik müəyyənləşdirmək mümkün olmamışdır. Ekspertlər bu məsələ ilə məşğuldurlar.
