Göygöldə “Aşıq Ələsgərin anım tədbirləri” layihəsinə yekun vurulub
Bakı, 20 iyul, AZƏRTAC
Göygöl Rayon Mədəniyyət Mərkəzində rayon icra hakimiyyətinin tərəfdaşlığı, Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə "Dədə Ələsgər Ocağı" İctimai Birliyi tərəfindən həyata keçirilən “Aşıq Ələsgərin anım tədbirləri” layihəsi çərçivəsində yekun tədbir keçirilib.
İctimai Birlikdən AZƏRTAC-a bildirilib ki, əvvəlcə Vətənimizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib. Daha sonra Aşıq Ələsgərin həyat və yaradıcılığına həsr olunmuş videoçarx nümayiş etdirilib.
Tədbirdə çıxış edən Göygöl Rayon İcra Hakimiyyətinin başçısı Vüqar Novruzov ustad sənətkarın milli-mənəvi sərvətlərimizin qorunması və inkişafındakı müstəsna xidmətlərindən bəhs edib. O bildirib ki, Aşıq Ələsgərin zəngin irsi əsrlər keçsə də öz aktuallığını qoruyur, milli kimliyimizin, vətənpərvərlik ruhunun və yüksək mənəvi dəyərlərimizin formalaşmasına mühüm töhfə verir. Natiq Ulu Öndər Heydər Əliyevin təşəbbüsü ilə ustad aşığın yubileylərinin dövlət səviyyəsində qeyd edildiyini, Prezident İlham Əliyevin müvafiq Sərəncamı ilə sənətkarın 200 illiyinin geniş şəkildə keçirildiyini və Bakıda abidəsinin ucaldıldığını xatırladaraq, bunu Aşıq Ələsgər irsinə verilən böyük dəyərin bariz nümunəsi kimi qiymətləndirib.
"Dədə Ələsgər Ocağı" İctimai Birliyinin sədri, Aşıq Ələsgərin nəticəsi və layihə rəhbəri Xətai Ələsgərli ustadın həyat yolu, poeziyasındakı vətən sevgisi, mənəvi saflıq və insanpərvərlik mövzuları barədə geniş məlumat verib. O, dövlət tərəfindən bu irsin qorunmasına göstərilən diqqət və qayğının gələcək nəsillər üçün müstəsna əhəmiyyət daşıdığını vurğulayıb.
Tədbirdə tibb elmləri doktoru İbadulla Ağayev, "Dədə Ələsgər irsinin tədqiqi və təbliği Mərkəzi"nin direktoru, tibb üzrə fəlsəfə doktoru Hacı Abbas Bağırov, şair-publisist Salman Balakişiyev və başqaları çıxış edərək layihənin əsas məqsədinin Aşıq Ələsgər irsini gənclərə tanıtmaq, Qərbi Azərbaycan aşıq məktəbinin yaşadılmasına və gələcək nəsillərə ötürülməsinə töhfə vermək olduğunu bildiriblər.
Tədbir aşıqların ifasından ibarət bədii hissə ilə başa çatıb.
Bölmənin digər xəbərləri
