Vətən müharibəsi veteranı: Hər kəs Şuşanın tarixi simasının qorunmasına öz töhfəsini verməlidir
Bakı, 4 sentyabr, AZƏRTAC
Şuşa Azərbaycan xalqının tarixi və mədəni yaddaşında xüsusi yer tutur. Şəhərin hər bir daşı, qayası xalqımızın tarixindən xəbər verir. Şuşaya gələn hər şəxs bu tarixi məkana böyük hörmətlə yanaşmalı, şəhərin təbiətinə və tarixi abidələrinə diqqətlə münasibət göstərməlidir. Müqəddəs sayılan daşların üzərində nəsə yazmaq birmənalı olaraq yolverilməzdir. O daşların hər biri şəhidlərimizin izidir. Şəhidlərimizin qanı bu torpağın hər qarışına, hər daşına hopub.
Bunu AZƏRTAC-a açıqlamasında İkinci Qarabağ müharibəsi veteranı Elnur Quliyev söyləyib.
O qeyd edib ki, Qarabağ uğrunda canından keçən şəhidlərin və bu torpaqların azadlığı uğrunda mübarizə aparan insanların xatirəsi hər zaman uca tutulmalıdır. Şəhərə gələn turistlər və yerli sakinlər Şuşanın tarixi simasının qorunmasına öz töhfələrini verməlidirlər.
Əslən Şuşalı olan E.Quliyev deyib: “Mənim uşaqlığım Şuşada, Cıdır düzündə keçib. Bu yerlərin hər bir daşı mənim üçün müqəddəsdir. Şuşa bizim üçün sadəcə şəhər deyil. Bura tariximiz, mədəniyyətimiz və şəhidlərimizin əmanətidir. Buradakı hər bir tarixi daş qorunmalıdır. O daşların hər biri şəhidlərin izidir. Onların adları daşların üzərinə deyil, tarixə yazılıb. İnsanlar Şuşaya öz evləri kimi yanaşmalıdırlar”.
Müxbir – Fidan Əlizadə
Bölmənin digər xəbərləri
