GUAM MƏKANINDAKI MÜNAQİŞƏLƏR BMT BAŞ MƏCLİSİNİN QARŞIDAKI SESSİYASINDA MÜZAKİRƏ EDİLMƏLİDİR
BMT-yə müraciətdə deyilir ki, GUAM məkanındakı, yəni Moldova, Gürcüstan və Azərbaycan ərazilərindəki münaqişələr 15 ildən çoxdur 16 milyondan artıq insanın həyatına ağır təsir göstərir və beynəlxalq sülh və təhlükəsizlik, BMT-nin üzvü olan üç dövlətin suverenliyi və ərazi bütövlüyü üçün təhlükə törədir.
Sənəddə nəzərə çarpdırılır ki, belə vəziyyət bu suveren dövlətlərin ərazisinin xeyli hissəsi üzərində nəzarətin itirilməsinə və işğalın davam etməsinə gətirib çıxarır ki, bu da qaçqın və məcburi köçkünlərin çoxmilyonlu axınlarının meydana gəlməsinə səbəb olur və region xalqlarının iqtisadi və sosial inkişafına maneçilik törədir.
Azərbaycan, Gürcüstan, Moldova və Ukrayna hesab edirlər ki, bu münaqişələrin həlli üçün beynəlxalq vasitəçilik heç bir nəticə verməmişdir. Buna görə də onlar bu məsələyə BMT Baş Məclisinin 61-ci sessiyasında prioritet qaydada baxılmasını təklif edirlər.
Keçən il GUAM-ın eyni təklifi gündəliyin təsdiqlənməsi barədə Baş Məclisə tövsiyələr verən Baş Komitədə dəstəklənməmişdir. Bu təklifin lehinə komitənin 28 üzvündən yalnız Azərbaycan, Böyük Britaniya və ABŞ səs vermişdi. Onun beş üzvü – Rusiya, Ermənistan, Anqola, Myanma və Venesuela təklifin əleyhinə olmuş, digər üzvlər bitərəf qalmışdı.
Xatırladaq ki, Baş Komitəyə BMT Baş Məclisinin sədri, onun 21 müavini və baş komitələrin rəhbərləri daxildir.
Bölmənin digər xəbərləri
