Gülağası Mirzəyev: “Balet günləri” layihəsinin məqsədi milli incəsənətimizin populyarlaşdırılmasıdır
Bakı, 3 noyabr, Günel Alıyeva, AZƏRTAC
Musiqi hərəkətdə canlananda, hərəkət isə poeziyaya çevriləndə ürəklə sözsüz danışa bilən sənət növü olan balet yaranır.
Bu günlərdə Bakı rəqs ritmi ilə nəfəs alır: ölkəmizdə ilk dəfə olaraq tanınmış ustaları və istedadlı gəncləri, klassik irsin şah əsərlərini və müasir teatr interpretasiyalarını səhnədə bir araya gətirən “Balet günləri” keçirilir.
Azərbaycan Respublikasının Xalq artisti, Azərbaycan Dövlət Akademik Opera və Balet Teatrının Balet Truppasının bədii rəhbəri Gülağası Mirzəyev AZƏRTAC-a bu layihənin missiyası, Azərbaycanın mədəni həyatı üçün əhəmiyyəti və Azərbaycan baletinin gələcəyi barədə danışıb.
- Gülağası müəllim, layihənin əsas məqsədi nədir, o hansı missiyanı həyata keçirir? “Balet günləri”ndə iştirak edən tamaşaçılara hansı mesajı çatdırmaq istərdiniz?
- Bu layihənin məqsədi sənət növümüzü populyarlaşdırmaqdır. “Balet günləri” çərçivəsində aktiv reklam kampaniyası və müxtəlif tədbirlər vasitəsilə tamaşaçıları balet sənəti ilə daha dərindən və yaxından tanış etməyə çalışırıq. Əsas ideya ondan ibarətdir ki, balet xüsusi diqqətəlayiq olan gözəl və mürəkkəb bir sənətdir.
- Azərbaycan baletinin hazırkı səviyyəsini və dünya səhnəsindəki yerini necə qiymətləndirirsiniz?
- Təəssüf ki, Azərbaycan baletinin hazırkı səviyyəsini onun inkişafının zirvəsi adlandırmaq olmaz. Bu, obyektiv reallıqdır. Lakin birgə səylərlə milli baletimizə əvvəlki şöhrətini qaytara bilərik. Zəngin mədəni irsimiz sayəsində biz bütün dünyada səyahət edib müxtəlif ölkələrdən olan insanları balet tamaşalarımızla tanış edə bilərik, çünki bizdə olan incəsənət sərvətinə heç yerdə rast gəlmək mümkün deyil. Bu sərvət milli xarakterdə, klassik balet və folklorun sintezində və əlbəttə ki, möhtəşəm musiqidədir.
- Azərbaycan baletini daha geniş auditoriyaya tanıtmaq üçün bu layihənin başqa şəhərlərə və ya ölkənin hüdudlarından kənara çıxarılması planlaşdırılırmı?
- Bu layihə sənətimizin inkişafında və təbliğində mühüm rol oynaya bilər. Ölkə rəhbərliyindən dəstək alsaq, Azərbaycan baletini dünyanın istənilən yerində təqdim etməyə hazırıq. Biz həyatımızı bu sənətə həsr etmişik və Azərbaycan baletinin vətənimizdən çox-çox uzaqlarda tanınması və haqqında danışılması üçün əlimizdən gələni edərik.
- Bu layihə ilə bağlı əsas gözləntiləriniz nədir və ona ictimai marağı necə qiymətləndirirsiniz?
- Gözəl bir atalar sözü var: “Yüz dəfə eşitməkdənsə, bir dəfə görmək yaxşıdır” və bu, sənətimizin mahiyyətini tamamilə əks etdirir. Bu layihə sayəsində teatr tamaşasına ilk dəfə gələn insanlar baletə tamamilə fərqli şəkildə göz gəzdirə bilərlər. Bir dəfə salona gəlib sonradan bizim daimi tamaşaçılarımıza çevrilən insanlara dair bir çox nümunə var. Mən hesab edirəm ki, bu, ona dəyər!
Bölmənin digər xəbərləri
