Bakı, 18 oktyabr, AZƏRTAC

Müslüm Maqomayev adına Azərbaycan Dövlət Akademik Filarmoniyasının nəzdində fəaliyyət göstərən Azərbaycan Dövlət Xor Kapellası nəinki ölkəmizdə, hətta onun hüdudlarından kənarda da tanınır və sevilir. Kapella mütəmadi olaraq keçirilən dövlət əhəmiyyətli tədbirlərin iştirakçısıdır. Azərbaycan musiqi mədəniyyətinin təbliğində kapellanın rolu böyük və əvəzsizdir.

AZƏRTAC xəbər verir ki, bu fikirləri Azərbaycan Dövlət Xor Kapellasının bədii rəhbəri və baş dirijoru, Xalq artisti Gülbacı İmanova söyləyib.

Azərbaycan mədəniyyətinin artıq hər yerdə tanındığını söyləyən Xalq artisti bunun Prezident İlham Əliyev və Birinci vitse-prezident Mehriban Əliyevanın düzgün siyasətinin nəticəsi olduğunu qeyd edib: “Bir çox ölkələrdə Azərbaycan Mədəniyyəti Günləri təşkil olunur. Ölkəmizdə beynəlxalq səviyyəli müsabiqələr, festivallar keçirilir. Paytaxtımıza təşrif buyuran qonaqlar ilk növbədə Filarmoniyanı ziyarət edir, əsərlərimizi dinləyir və azərbaycanlıların nə qədər yüksək mədəniyyətə sahib millət olduğunu görürlər”.

Xalq artisti xatırladıb ki, bu yaxınlarda Azərbaycan Dövlət Xor Kapellası Gürcüstanın Qori şəhərində keçirilən Beynəlxalq Xor Festivalında ölkəmizi uğurla təmsil edib. Festivalda Gürcüstan Dövlət Xoru, Qori Qadınlar Xoru və müxtəlif ölkələrdən xor qrupları iştirak ediblər.

“Festivalda kapellamız fərqli bir proqram nümayiş etdirib. Biz həm xarici, həm də Azərbaycan bəstəkarlarının əsərlərini ifa etmişik ki, bu da xüsusi bacarıq və peşəkarlıq tələb edir. Bir konsert daxilində bir-birindən üslub cəhətdən fərqli olan müxtəlif kompozisiyalar ifa etmək çox çətindir. Qalan kollektivlər yalnız öz milli musiqisini ifa ediblər. Bu cür festivallar kollektivimizə təcrübə mübadiləsi aparmağa, yeni musiqi ilə tanış olmağa, digər xorlarla tərəfdaşlıq qurmağa imkan verir. Xor kapellamız ilk dəfə 1996-cı ildə Qori şəhərində olub. Bundan sonra festivalın keçirilməsi dayandırılıb. Bu qədər müddətdən sonra təşkilatçılar onu bərpa etmək qərarına gəliblər və bizi 2016-cı ildən bəri iştirak etməyə dəvət etdilər. Hər şey yüksək səviyyədə təşkil olunmuşdu. Festivalda dünyaşöhrətli musiqişünaslar, müxtəlif ölkələrin səfirləri, eləcə də Avropa festivallarının təşkilatçıları qonaq qismində iştirak ediblər. Kollektivimiz hamının diqqətini çəkdi. Tamaşaçıların reaksiyası fantastik idi. Kollektivimizin çıxışı alqışlarla qarşılanıb. Gürcülər bizi çox isti qəbul etdilər və musiqimizə növbəti dəfə heyran oldular. Festivalda gözəl çıxışımıza görə diplomla təltif edildik”, - deyə G.İmanova vurğulayıb.

Qeyd edək ki, Azərbaycan Dövlət Xor Kapellası 1926-cı ildə Azərbaycan professional musiqi sənətinin banisi Üzeyir Hacıbəyli tərəfindən çoxsəsli xor, 1966-cı ildə isə Azərbaycan Dövlət Filarmoniyasının nəzdində yaranıb. Yarandığı vaxtdan uzun illər boyu kollektivə Əməkdar incəsənət xadimi, xormeyster Eduard Novruzov rəhbərlik edib. Kapellanın repertuarında mindən çox əsər var. Xor kapellası dəfələrlə Azərbaycan musiqisini ölkəmizin sərhədlərindən kənarda təbliğ edib, bir çox festivallar, dekadalar, mədəniyyət günlərinin iştirakçısı olub. 1996-cı ilin fevral ayından Kapellanın bədii rəhbəri, Xalq artisti Gülbacı İmanovadır.