Astara, 11 yanvar, Bağır Əliyev, AZƏRTAC

Müstəqil Azərbaycan dövlətinin uğurlu inkişaf strategiyasının istiqamətlərini müəyyənləşdirən ulu öndər Heydər Əliyevin uzaqgörən siyasətinin layiqincə davam etdirilməsi nəticəsində ölkəmiz gündən-günə inkişaf edir, gözəl, abad, yaraşıqlı bir diyara çevrilir. Azərbaycanın bütün regionlarında sürətlə aparılan tikinti-quruculuq və abadlıq işləri ilə şəhər, qəsəbə və kəndlərimiz gözəlləşir, insanların firavan yaşayışı üçün ideal şərait yaradılır.

Astara rayonunda da son illər sosial-iqtisadi inkişafın sürətləndirilməsi ilə əlaqədar genişmiqyaslı tədbirlər həyata keçirilir. Azərbaycan Prezidentinin imzaladığı sərəncamlarla ayrılan vəsait hesabına rayonun şəhər, qəsəbə və kəndlərində çoxlu tikinti-quruculuq, abadlıq işləri görülüb, yüzlərlə yeni iş yerləri açılıb.

Azərbaycanın dilbər guşələrindən olan Astara rayonu təbiətin bəxş etdiyi nadir gözəllikləri ilə yanaşı, insan əməyi ilə yaranan gözəllikləri ilə də fəxr edir. Şəhərin mərkəzində ən müasir memarlıq üslubunda inşa edilmiş Heydər Əliyev Mərkəzi, Gənclər Evi, Olimpiya İdman Kompleksi, Astara Boks Mərkəzi, 40-dan çox yeni tikilmiş, yaxud əsaslı təmir olunaraq istifadəyə verilmiş məktəblər, yenidən qurulan Astara Rayon Mərkəzi Xəstəxanası, yeni tikilmiş inzibati idarə və yüksək səviyyədə təmir edilmiş ictimai yaşayış binaları, 10 kilometrlərlə şəhərdaxili və kəndarası yollar, şəhərə çəkilən içməli su şəbəkəsi, rayon ərazisindən keçən çaylarda aparılan sahilbərkitmə işləri, Astara şəhərinin prospekt və küçələrinin yenidən qurularaq müasir işıqlandırma sistemi ilə təmin edilməsi, çoxmərtəbəli ictimai yaşayış binaların dam örtüklərinin dəyişdirilməsi, fasad və bloklarının təmir edilməsi son illər görülən işlərin bir qismidir.

Azərbaycanın cənubdan giriş qapısı olan Astara rayonunda əsaslı şəkildə yenidənqurma işləri sürətlə davam edir. Təkcə ötən il Səncərədi kəndində yeni uşaq bağçası, Kijəbə qəsəbəsində uzunluğu 2 kilometr olan, 150 ev təsərrüfatını suvarma suyu ilə təmin edən su xətti çəkilib, Ərçivan qəsəbəsində çəltik emalı zavodu və çəltik dəyirmanı, Motalayataq kəndində tibb məntəqəsi, 360 şagird yerlik Burzubənd kənd tam orta, Qapıçıməhəllə kənd ümumi orta, Şəmətük, Dolu, Lomin və Dürriyə kənd ibtidai məktəb binaları, Astara şəhərində istismar müddəti başa çatmış çoxmənzilli binaların sakinlərinin mənzil-məişət şəraitini yaxşılaşdırmaq məqsədi ilə 48 mənzilli yaşayış binası tikilib istifadəyə verilib, Ərçivan-Artupa-Səncərədi-Alaşa-Züngüləş avtomobil yoluna asfalt döşənib.

Torpaq sürüşməsi nəticəsində evləri qəzalı vəziyyətə düşmüş şəxslər üçün 36 mənzilli yaşayış binasının tikintisinə başlanılıb, “Zirvə” beynəlxalq idman klubu tərəfindən beynəlxalq yarışların keçirilməsi üçün basketbol meydançası və idman zalının, Siyaku kəndində bal emalı məntəqəsinin tikintisi yekunlaşmaq üzrədir.

Xəzər dənizi sahilində salınan park-bulvar kompleksi və rayonun ən ucqar dağ kəndlərinə çəkilən avtomobil yolları isə bir ayrı mənzərədir.

Son illər rayon ərazisində, ümumilikdə, 150 kilometrdən çox avtomobil yolu asfaltlaşdırılıb. Rayonun ən ucqar dağlıq əraziləri olan, mərkəzdən 35-45 kilometr aralıda yerləşən, 30 min nəfər əhalinin yaşadığı 45 yaşayış məntəqəsini birləşdirən Deqədi-Pəlikəş, Taxtanəkəran-Miki, Taxtanəkəran-Toradi avtomobil yollarının tikintisi Astaranın tarixində unudulmaz hadisələrdəndir.

Yüksək səviyyədə tikilərək asfaltlaşdırılan avtomobil yolları rayonun bütün yaşayış məntəqələrini birləşdirir. Şəraitsizliyə görə ucqar kəndləri tərk edən gənclər doğma kəndlərinə qayıdır, yeni müasir tipli evlər, ticarət obyektləri, istirahət guşələri tikilir, səfalı dağlar qoynuna gələn turistlərin sayı günbəgün artır.

Heç vaxt elektrik xətti olmayan Şəvqo, Dolu, Diqo, Avyarud, Sibiyyət, Sekəşan kəndlərinə Azərbaycan Prezidentinin Sərəncamı ilə elektrik xətti çəkilib.

Hazırda sıldırım qayaların qoynunda, çətin relyefdə yerləşən Dolu və Diqo kəndlərinə avtomobil yolunun çəkilişi üçün ən müasir texnikalarla yol çəkilişinə başlanılıb. Bu avtomobil yolları təkcə Dolu və Diqo kəndlərini deyil, həmin istiqamətdə yerləşən və heç vaxt yolu olmayan daha bir neçə dağ kəndini birləşdirəcək, burada yaşayan insanların əzablarına son qoyulacaq. İllərdir həsrətində olduqları ən böyük arzularına çatan yerli sakinlər - kiçikdən böyüyə hər kəs bu rahatlığa, firavanlığa, yüksək diqqət və qayğıya görə dövlətimizin başçısına sonsuz məhəbbətlərini, dərin minnətdarlıqlarını bildirirlər.

Tikinti-quruculuq sahəsində rayonda həyata keçirilən ən böyük layihələrdən biri də Xəzər dənizi sahilində hektarlarla bataqlığa çevrilmiş kol və qamışların örtdüyü ərazinin qurudularaq abadlaşdırılması, ən müasir memarlıq üslubunda dənizkənarı park-bulvar kompleksinin salınmasıdır. Burada İran sərhədinə yaxın ərazidə Azərbaycan bayrağının dalğalandığı Bayraq meydanı, möhtəşəm qala divarı, şəlalə, fontan, fitnes və uşaq əyləncə meydançası tikilib. Atçılıq mərkəzi, avtokartinq meydançası, velosiped zolağı, kafe çay evi, karusellər fəaliyyət göstərir, insanlar mənalı istirahət edir, asudə vaxtlarını səmərəli keçirirlər.

Park-bulvarın şöhrəti nəinki respublikamızda, onun hüdudlarından kənara da yayılıb. Qonşu ölkələrlə yanaşı, hətta Avropa ölkələrindən hər il yaz-yay mövsümündə minlərlə turist və rayona gələn qonaqlar dənizkənarı park-bulvarda fəaliyyət göstərən kotteclərdə, hotellərdə və digər xidmət obyektlərində istirahət edirlər.

Hazırda park-bulvarın ətrafında müasir turizm infrastrukturları-mehmanxana və hotellər tikmək, idman-əyləncə obyektləri yaratmaq, çoxmərtəbəli ictimai yaşayış binaları, iaşə obyektləri inşa etməklə yeni iş yerlərinin açılması üçün tədbirlər planlaşdırılır.

Park-bulvarın salınması, tarixi, mədəni, təbiət abidələri ilə zəngin olan gözəl və saf təbiətə malik ucqar dağ kəndlərinə asfalt yolların çəkilməsi ilə rayona gələn turistlərin sayı ildən-ilə artır.

Böyük turizm potensialı olan, mülayim subtropik iqlimə malik Astarada Xəzər dənizi sahilində çimərliklər, Sım, Ağkörpü, Asxanakəran, Toradi kəndlərində, İstisuda termal sular, nadir təbii landşaft və təbiət abidələri var. Rayon üzrə müəyyən edilmiş turizm marşrutları əsasən daşınmaz tarix və mədəniyyət abidələri, tarixi yerlər, ziyarətgahlar, inanc yerləri ilə yanaşı, eyni zamanda, nadir el sənətkarlığının, qədim adət-ənənələrin və folklorun qorunduğu, inkişaf etdiyi yaşayış məntəqələrindən keçir. Bu yaşayış məntəqələrinin yol infrastrukturunun yaxşılaşdırılması nəticəsində kənd-yaşıl turizmi və mədəni turizmin inkişafına geniş imkanlar açılıb.

Beynəlxalq əhəmiyyətli Ələt-Astara avtomobil yolunun tikintisi respublikada, o cümlədən regionlarda turizmin, kənd təsərrüfatının və iqtisadiyyatın bütün sahələrinin inkişafına sanballı töhfəsini verməkdədir.

Hazırda icrasına başlanmış ən böyük layihə Bakı-Astara dəmir yolu xəttinin Xəzər dənizi sahilindən Ələt-Astara magistral yoluna paralel köçürülməsidir. Layihənin icrası nəticəsində dəniz sahili genişlənəcək və dənizlə sərhəd aradan qaldırılaraq ərazidə infrastruktur layihələr həyata keçiriləcək.

Astara şəhərinin su təchizatının yaxşılaşdırılmasından ötrü Xanbulançay su anbarından çəkilən içməli su xətti layihəsi də son illərin həllini tapmış mühüm sosial məsələlərdən biridir. Şəhərdən sonra xətt boyunca yerləşən bütün yaşayış məntəqələrinə su xəttinin çəkilməsi nəzərdə tutulub. Bundan, ümumilikdə, 100 mindən çox sakin faydalanacaq. Hazırda rayonun 27 kəndinə magistral kəmərdən çıxışlar verilib, digər kəndlərə su xəttinin çəkilişi davam etdirilir.

Rayonda tikinti-quruculuq işlərinin geniş vüsət alması üçün sahibkarlar və iş adamlarına hər cür imkan yaradılıb. Şəhərin mərkəzində tikilib istifadəyə verilən 9 mərtəbəli ictimai yaşayış binası, park-bulvar kompleksinə yaxın ərazidə tikilən kotteclər, hazırda burada inşa edilən dördulduzlu hotel, ayrı-ayrı ərazilərdə salınan turizm istirahət yerləri, onlarla müasir tipli ticarət evləri və digər tikililər bunun bariz nümunəsidir.

Rayonda aparılan tikinti-quruculuq və abadlıq işləri ilə yanaşı, aqrar sahənin inkişafına da diqqət artırılıb. Azərbaycan Prezidentinin kənd təsərrüfatının sürətlə inkişaf etdirilməsi ilə əlaqədar tövsiyə və tapşırıqlarına uyğun olaraq sahibkarlar, fermerlər və iş adamları ilə görüşlər keçirilməsi, onların maneəsiz fəaliyyət göstərmələri üçün imkanların yaradılması, mövcud problemlərin operativ həlli üçün konkret və əməli tədbirlər görülməsi illərdən bəri istifadəsiz qalan torpaq sahələrinin böyük hissəsinin dövriyyəyə qaytarılmasına səbəb olub.

Sitrus meyvələrinin istehsalına diqqətin artırılması sayəsində sitrus bağlarının ümumi sahəsi 4120 hektara çatdırılıb. Sitrus meyvəçiliyinin daha səmərəli və məhsuldar inkişafını təmin etmək məqsədilə xarici ölkələrdən rayona yeni sort tinglər gətirilərək təsərrüfatlarda əkilib.

Rayonun perspektivli sahələrindən olan çayçılığın inkişafında əldə edilən nailiyyətlər də sevindiricidir. 345 hektar çay sahəsinin məhsuldar olan 197 hektarından ötən il 417 ton yaşıl çay yarpağı yığılaraq çay fabriklərinə təhvil verilib.

İlboyu fəaliyyət göstərən “Astaraçay” fabrikində Yaponiya və Koreyadan gətirilən texnologiyalarla istehsal edilən yüksək keyfiyyətli, ekoloji təmiz Astara çayı Moskva və digər şəhərlərdə keçirilən beynəlxalq sərgilərdə mükafata layiq görülüb, Dubayda keçirilən sərgidə nümayiş olunub. Bakıda və respublikanın digər bölgələrində müxtəlif satış nöqtələri var ki, orada Astarada istehsal olunan çay məhsulları satılır.

Son zamanlar rayonda kivi bitkisinə maraq xeyli artıb, ayrı-ayrı yaşayış məntəqələrində fərdi və fermer təsərrüfatlarında 126 hektarda kivi bitkisi əkilib.

Astarada ailə biznesini genişləndirmək məqsədi ilə işaxtaran və işsiz vətəndaşlardan 112 nəfər özünüməşğulluq layihəsinə cəlb edilib, 2020-ci ilin özünəməşğulluq layihəsində iştirak etmək üçün 400 nəfər müraciət edib.

Ötən ilin noyabr ayında İDEA İctimai Birliyinin təşəbbüsü ilə rayon ərazisində salınan sosial bağda iki hektar ərazidə 1250 ədəd feyxoa bitkisi əkilərək sosial vəziyyətlərini yaxşılaşdırmaqdan ötrü 1 nəfər şəhid ailəsi, 1 nəfər Qarabağ əlili və daha 1 nəfər aztəminatlı ailəyə təhkim olunub.

Rayonda şəhid ailələri, Qarabağ müharibəsi əlilləri və veteranlara xüsusi həssaslıqla yanaşılır. Son illər növbə əsasında 27 nəfər şəhid ailəsi, 35 nəfər Qarabağ əlili, 7 nəfər Çernobıl əlili, 1 nəfər Əfqanıstan əlili üçün fərdi yaşayış evi ilə təmin olunub, 5 şəhid ailəsi və 5 Qarabağ müharibəsi əlili üçün fərdi yaşayış evlərinin tikintisi davam etdirilir.

Rayon gənclərinin ölkəmizdə keçirilən müxtəlif intellektual yarışlarda uğurla iştirak etməsi, yeniyetmə və gənclərin təkcə bu il beynəlxalq miqyaslı idman yarışlarında 29 medal qazanması sevindiricidir. Yeni təşkil olunmuş kişilərdən ibarət “Zirvə Astara” basketbol komandasının Azərbaycan çempionatında uğurlu çıxışı da diqqətçəkən məqamlardandır. Astara Olimpiya İdman Kompleksində, Ərçivan Boks Mərkəzində və digər idman obyektlərində hər gün yüzlərlə gənc idmanın müxtəlif növləri ilə məşğul olur.

Astara şəhərində dəniz kənarında yeni inşa edilən “Zirvə” idman və sağlamlıq mərkəzində beynəlxalq səviyyəli yarışlarda iştirak edəcək idmançıların hazırlıq məşqləri keçirməsi üçün ideal şərait yaradılıb.

Astara gündən-günə inkişaf edir, gözəlləşir, abadlaşır. Bu yüksək inkişafı seyr etdikcə hər bir astaralı müstəqil, qüdrətli Azərbaycanımızın bugünkü yüksək inkişafından sevinir, qürur hissi keçirir. Ölkəmizdəki siyasi sabitlik, iqtisadi yüksəliş və xalqın öz Prezidentinə inamı, xalqla rəhbərin sıx birliyi bundan sonra da müstəqil dövlətimizi daha böyük inkişafa, xalqımızı firavanlığa qovuşduracaq.

Bağır Əliyev

AZƏRTAC-ın müxbiri