Gürcü politoloq: Heydər Əliyev xalqlarımız arasında əlaqələrin inkişafında misilsiz xidmətlər göstərib
Tbilisi, 15 iyun, AZƏRTAC
Dahi şəxsiyyət Heydər Əliyev təkcə Azərbaycan xalqının deyil, Gürcüstanın və gürcü xalqının da xilaskarıdır. Məhz onun uzaqgörən siyasəti və müdrikliyi sayəsində Azərbaycan və Gürcüstan arasında əlaqələr yeni müstəvidə inkişaf edərək daha da möhkəmlənib.
Bu sözləri AZƏRTAC-a müsahibəsində politoloq, Gürcüstanın Suxumi Dövlət Universitetinin professoru, tarixçi Quram Marxuliya söyləyib.
Müsahibimiz vurğulayıb ki, bu gün Azərbaycanın tərəqqisi ümummilli lider Heydər Əliyevin adı ilə bağlıdır. Heydər Əliyev xalqlarımız arasında möhkəm qardaşlıq münasibətlərinin əsasını qoyub və bu əlaqələrin inkişafında misilsiz xidmətlər göstərib.
Q.Marxuliya deyib: “Azərbaycanın təşəbbüsü ilə regionda yeni mühüm infrastruktur layihələr həyata keçirilir. İnanırıq ki, bu layihələr həm region, həm də Azərbaycan üçün böyük iqtisadi faydalar gətirəcək.
Azərbaycan öz torpaqlarını erməni işğalından azad edib. İndi həmin ərazilərdə genişmiqyaslı bərpa və quruculuq işləri həyata keçirilir. Mən həmin ərazilərdə və Şuşada olmuşam. Azərbaycanın belə sürətlə Şuşanı bərpa etməsi məni olduqca təəccübləndirib.
“Bu gün Azərbaycan dünyada çox vacib yer tutur, beynəlxalq münasibətlərdə nüfuzu gündən-günə artır. Azərbaycan əsas geosiyasi oyunçularla münasibətlərdə müstəqil siyasət aparır. Bu da mövcud problemlərin həllində əsas aparıcı amil ola bilər”, - deyə politoloq fikrini yekunlaşdırıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
