Gürcüstan mətbuatında “Xocalı: Bitməyən ağrıdan zəfər təntənəsinə” sərlövhəli məqalə dərc olunub
Tbilisi, 27 fevral, AZƏRTAC
Gürcüstanın nüfuzlu “Sakartvelos Respublika” qəzetində Nəriman Əliyevin Xocalı soyqırımının 34-cü ildönümünə həsr olunmuş “Xocalı: Bitməyən ağrıdan zəfər təntənəsinə” sərlövhəli məqaləsi dərc olunub.
AZƏRTAC xəbər verir ki, məqalədə tarixə nəzər salınır, 1992-ci il fevralın 25-dən 26-na keçən gecə Ermənistan silahlı qüvvələri tərəfindən törədilən bu qətliam nəticəsində 613 dinc sakinin, o cümlədən 106 qadın, 63 uşaq və 70 qocanın amansızlıqla qətlə yetirildiyi, 8 ailənin tamamilə məhv edildiyi, yüzlərlə insanın şikəst qaldığı və əsir götürüldüyü qeyd edilir.
Bildirilir ki, bu gün Xocalını anarkən təkcə faciə xatırlanmır, həm də Xocalı qurbanlarının qisasının döyüş meydanında alındığı vurğulanır. 2023-cü ilin sentyabrında keçirilən antiterror tədbirləri nəticəsində Xocalı şəhəri tamamilə azad edilib və Azərbaycanın dövlət bayrağı orada ucaldılıb.
Müəllif Prezident İlham Əliyevin rəhbərliyi altında Xocalı faciəsinin dünya miqyasında tanıdılması və ədalətin bərpası istiqamətində görülən misilsiz işləri də qeyd edib. Bildirib ki, dövlət başçısının yürütdüyü aktiv xarici siyasət nəticəsində bir çox ölkələr və beynəlxalq təşkilatlar Xocalı hadisələrini rəsmən soyqırımı kimi tanıyıb. Heydər Əliyev Fondunun dəstəyi ilə həyata keçirilən "Xocalıya ədalət!" kampaniyası bu işdə mühüm rol oynayıb.
Məqalənin Hərbi Strategiya və Qisas bölümündə deyilir: “İlham Əliyev hər zaman vurğulayırdı ki, Azərbaycan xalqı bu təhqirlə barışmayacaq. 44 günlük Vətən müharibəsi və lokal antiterror tədbirləri ilə o, Müzəffər Ali Baş Komandan kimi Xocalı qatillərindən qisası döyüş meydanında aldı”.
Müəllif Xocalının yenidən qurulduğunu da qeyd edib: “Bu gün Xocalı şəhəri Prezidentin birbaşa nəzarəti altında yenidən tikilir. 2024-cü ilin fevralında Xocalı şəhərində Xocalı Soyqırımı Memorial Kompleksinin təməlinin qoyulması və şəhərin sakinlərinin öz evlərinə qaytarılması bu tarixi ədalətin ən böyük sübutudur”.
Cinayətkarların məsuliyyətə cəlb edilməsi ilə bağlı hissə də diqqəti çəkir: “Xocalı qətliamında iştirak edən separatçı liderlərin və hərbi cinayətkarların Bakıda ədalət qarşısında cavab verməsi İlham Əliyevin qətiyyətli siyasətinin nəticəsidir”.
Sonda o da vurğulanır ki, bu gün Xocalı artıq əsir şəhər deyil. İlham Əliyevin liderliyi sayəsində Azərbaycan həm hərbi, həm də siyasi-diplomatik müstəvidə qalib gələrək, 34 illik yaraya məlhəm qoymuşdur.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
