Gürcüstanda beynəlxalq əhəmiyyətli Rikoti aşırımında yolun açılması sual altındadır
Tbilisi, 3 aprel, AZƏRTAC
Gürcüstanın şərqi ilə qərbini birləşdirən beynəlxalq əhəmiyyətli magistral yolun Rikoti aşırımındakı hissəsində təhlükəli vəziyyət yaranıb. Aşırımda bütün növ avtomobillərin hərəkəti dayandırılıb.
AZƏRTAC xəbər verir ki, bu barədə Gürcüstan Avtomobil Yolları Departamentinin sədri Giorgi Tsereteli bu gün keçirdiyi brifinqdə məlumat verib.
Rikoti aşırımında güclü yağışlar və qarın əriməsi nəticəsində çatlar əmələ gəlib ki, bu da güclü torpaq sürüşməsi təhlükəsi yaradıb. Bu səbəbdən də yolda avtomobillərin hərəkəti dayandırılıb.
Qeyd edək ki, son vaxtlar Gürcüstan ərazisində yağan güclü qar, leysan yağışları və çovğun nəticəsində beynəlxalq əhəmiyyətli yollarda ciddi problemlər yaranmışdı. Torpaq sürüşməsi və qar uçqunu səbəbindən Rikoti tunelində və aşırımda avtomobillərin hərəkəti dayandırılıb.
Hazırda departament beynəlxalq yükdaşımalarda yaranmış problemin həlli üçün alternativ yollar axtarır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
