Gürcüstanda milli azlıqlar üçün nəzərdə tutulmuş “1+4” proqramı təkmilləşdirilir
Tbilisi, 4 iyun, AZƏRTAC
Gürcüstanda milli azlıqlar üçün nəzərdə tutulmuş “1+4” proqramı daha da təkmilləşdirilir. Hazırda bu proqram çərçivəsində nəzərdə tutulan təqaüdün həcmi artırılıb.
Bu sözləri AZƏRTAC-a açıqlamasında Gürcüstanın təhsil və elm naziri Aleksandre Tsuladze söyləyib.
Onun sözlərinə görə, minlərlə tələbə bu layihə çərçivəsində təhsil alır. Bu proqramın bağlanması ilə bağlı narahatçılığa əsas yoxdur. Hökumət və nazirlik bu proqramın ölkədə ehtiyac duyulduğu vaxta qədər davam etməsini istəyir.
“Amma biz çox sevinərik ki, ölkədə yaşayan bütün millətlər öz ana dilləri ilə yanaşı, dövlət dilini də mükəmməl öyrənsinlər və Gürcüstanda bu layihəyə ehtiyac qalmasın”, – deyə nazir vurğulayıb.
Ölkədə Azərbaycan dilli məktəblərdə bəzi dərsliklərdə tərcümə qüsurlarının olduğunu etiraf edən nazir deyib: “Mən azərbaycanlı həmkarımla bu məsələni müzakirə etmişik. Yaxın vaxtlarda həmin dərsliklər üzərində işləyəcək mütəxəssislərdən ibarət işçi qrup yaradılacaq və düşünürəm ki, bu sahədəki problemlər də öz həllini tapacaq”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
