Gürcüstanın Dövlət Nazirliyi milli azlıqlar üçün yeni layihə həyata keçirəcək
Tbilisi, 14 aprel, AZƏRTAC
Aprelin 15-dən Gürcüstanda “Etnik azlıqlar üçün təmənnasız hüquqi xidmətlərə giriş” adlı məlumat kampaniyası başlayacaq.
Bu barədə AZƏRTAC-a Dövlət nazirinin müşaviri Ayaz Məmmədov məlumat verib. O bildirib ki, kampaniya Barışıq və Vətəndaş Bərabərliyi üzrə Dövlət nazirinin təşəbbüsü, USAID, Tolerantlıq, Vətəndaşlıq Şüuru və İnteqrasiya (UNAG) və ABŞ-ın Beynəlxalq İnkişaf Agentliyinin dəstəyi ilə təşkil olunur.
Dövlət naziri Tea Axvlediani deyib ki, vətəndaş bərabərliyi siyasətinin prioritet istiqamətlərindən biri də etnik azlıqların nümayəndələri üçün dövlət proqramları və müxtəlif mövzularda tədbirlər keçirməklə onların məlumatlılığını artırmaqdır.
Etnik azlıqlar üçün təmənnasız hüquqi xidmətlər vətəndaş bərabərliyi və dövlət siyasətinin əsas prioritetlərdən biridir.
Layihə çərçivəsində Gürcüstanın bölgələrində, o cümlədən azərbaycanlıların daha çox yaşadıqları Kvemo Kartli bölgəsinə daxil olan Marneuli, Bolnisi, Qardabani, Dmanisi, Tsalka, Tetriskaro və digər ərazi vahidlərində, kənd və qəsəbələrdə xüsusi pulsuz hüquqi yardım üzrə maarifləndirmə tədbirləri keçiriləcək.
Müəllimlərə, gənclərə ilk dəfə hüquqi yardım və ondan istifadə qaydaları haqqında məlumat veriləcək.
Kampaniyadan müəllim və şagirdlər, gənclər, bələdiyyə üzvləri, eləcə də maraqlı olan hər bir vətəndaş yararlana biləcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
