Gürcüstanla Türkiyə beynəlxalq avtomobil yük daşımaları üçün rəqəmsal icazə sistemini işə salır
Tbilisi, 6 iyul, AZƏRTAC
Gürcüstan ilə Türkiyə beynəlxalq avtomobil yük daşımaları üçün rəqəmsal icazə sistemini işə salır.
AZƏRTAC xəbər verir ki, bu barədə Gürcüstanın İqtisadiyyat və Davamlı İnkişaf Nazirliyinin Quru Nəqliyyatı Agentliyi məlumat yayıb.
Bildirilir ki, Quru Nəqliyyatı Agentliyi Türkiyə tərəfi ilə beynəlxalq avtomobil yük daşımaları üçün rəqəmsal icazə sənədlərinin verilməsi və mübadiləsi proseduruna başlayıb. Yeni mexanizmin işə salınması nəticəsində Gürcüstan və Türkiyə arasında beynəlxalq yük daşımalarını həyata keçirən daşıyıcılar icazə sənədlərindən tam rəqəmsal formatda istifadə etmək imkanı əldə edəcək.
Bundan əlavə, bu dəyişiklik inzibati prosedurları əhəmiyyətli dərəcədə sadələşdirəcək, kağız əsaslı sənədlərin işlənməsi ehtiyacını azaldacaq, icazə sənədlərinin verilməsi və nəzarəti prosesini sürətləndirəcək və beynəlxalq daşımaların səmərəliliyini artıracaq.
Agentlik hesab edir ki, Türkiyə ilə birlikdə ECMT (Avropa Nəqliyyat Nazirləri Konfransı Çoxtərəfli İcazə) elektron sisteminin və rəqəmsal icazə mexanizminin uğurla istifadəyə verilməsi beynəlxalq avtomobil yük daşımaları sektorunun inkişafında mühüm mərhələdir.
Bu proseslər nəqliyyat və logistika sektorunun inkişafına, beynəlxalq ticarətin asanlaşdırılmasına və Gürcüstanın regional tranzit mərkəzi kimi rolunun daha da güclənməsinə töhfə verəcək.
Bölmənin digər xəbərləri
