Hakimlər Komitəsinin sədri vəzifəsinə Rəhim Həsənovun təyinatı doğru seçimdir - AÇIQLAMA
Bakı, 27 noyabr, AZƏRTAC
Hakimlər Komitəsinin sədri vəzifəsinə Rəhim Həsənovun gətirilməsi gözəl addımdır. Ötən gün AFFA-nın baş katibi də məndən təyinat barədə soruşmuşdu. Seçimin doğru olduğunu söylədim.
Bu sözləri AZƏRTAC-a açıqlamasında ümumittifaq dərəcəli referi Rüstəm Rəhimov Rəhim Həsənovun AFFA Hakimlər Komitəsinin yeni sədri təyin edilməsinə münasibət bildirərkən deyib.
Onun sözlərinə görə, yerli kadrlara şans verilməsi ölkə futbolunun inkişafına da müsbət təsir edəcək: “Heç kəs nəyisə birdən-birə öyrənmir. İllər ərzində biliklər əldə edirsən. Rəhim Həsənov mənim tələbəm olub. Həm mədəni, həm də işində peşəkar insandır. FIFA hakimi kimi fəaliyyət göstərib və yaxşı təcrübəsi var. Düşünürəm ki, o, bu vəzifədə işləyərək, biliklərini daha da artıracaq”.
R.Rəhimov Hakimlər Komitəsinin sabiq sədri Frank De Blekerenin işinə də qiymət verib: “Onun gəlişindən sonra hakimlərimizin beynəlxalq səviyyəli yarışlara təyinatı xeyli artıb. Bu, müsbət məqamdır. De Blekere daha çox UEFA-da olurdu. Düzünü desək, bu zaman hakimlərin işinə baxmaq bəzən çətin olur. Belçikalı mütəxəssisə yeni vəzifəsində uğurlar arzulayıram”.
Qeyd edək ki, Hakimlər Komitəsinin sədri Frank De Blekere bundan sonra Beynəlxalq Hakimlik və hakimlərin təlim-tədrisi üzrə baş katibin müşaviri vəzifəsini icra edəcək.
Bölmənin digər xəbərləri
