Haqsız rəqabət hallarının qarşısı alınır
Bakı, 7 may (AZƏRTAC). Sumqayıt şəhəri, Sülh küçəsi, 76 ünvanında "EL-Plastik" MMC-yə məxsus istehsalat sahələrində aparılan yoxlamalar zamanı polimer torbaların istehsalında yararlılıq müddəti ötmüş boyalardan istifadə edilməsi, istifadə olunan boyaların qida ilə təmasına icazə verilməsini təsdiqləyən müvafiq sənədlərin olmaması, polimer torbaların üzərində təyinatına uyğun olaraq "Ərzaq malları üçün" və ya "Qeyri-ərzaq malları üçün" sözlərinin qeyd edilməməsi və torbaların qablaşdırıldığı taraların markalanmasının qanunvericiliyin tələblərinə uyğun aparılmaması səbəbindən "El-Plastik" MMC barəsində İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən antiinhisar qanunvericiliyinin tələblərinin pozulması əlamətləri üzrə iş qaldırılmışdır.
Nazirliyin mətbuat xidmətindən AZƏRTAC-a bildirmişlər ki, Dövlət Xidmətində istehlakçıları çaşdırmaqla haqsız rəqabətə yol verilməsi ilə bağlı işə baxılmış və "Haqsız rəqabət haqqında" Qanunun tələblərini pozduğuna görə polietilen torba istehsalı ilə məşğul olan “El-Plastik" MMC-yə 11,5 min manat maliyyə sanksiyası tətbiq edilmişdir.
Bölmənin digər xəbərləri
