HƏKİMLƏRİN SƏHVLƏRİ ÜZÜNDƏN HƏR İL MİNLƏRLƏ BRİTANİYALI ÖLÜR
XTMA-nın bu günlərdə yayılan məruzəsində deyilir ki, keçən il Britaniya xəstəxanaları həkimlərinin və işçi heyətinin səhvləri nəticəsində 526 599 xəstə zərər çəkmişdir. 2 159 halda həkimlərin səriştəsizliyi və ya etinasızlığı xəstələrin ölümü ilə nəticələnmişdir.
Reseptlərin düzgün yazılmaması, cərrahi əməliyyatların başdansovma aparılması, düzgün diaqnoz qoyulmaması və xəstənin tibb vərəqəsinin itirilməsi Böyük Britaniyada ən geniş yayılmış həkim səhvləridir.
Britaniya Pasientlər Assosiasiyasının nümayəndəsi Ketrin Merfinin sözlərinə görə, XTMA-nın məruzəsində göstərilən bütün ölüm hallarının qarşısını almaq, əslində, mümkün idi. Xanım Merfi demişdir: “Adamlar xəstəxanaya müalicə olunmağa gəlirlər. Biz tibbi heyətə rəğbət bəsləyə bilərik, çünki bu adamların necə güclü təzyiq altında olduğundan xəbərimiz var, buna baxmayaraq, ölüm hallarına görə kimsə məsuliyyət daşımalıdır”.
Böyük Britaniya Səhiyyə Nazirliyinin nümayəndəsi məruzədəki məlumatları şərh edərək bildirmişdir ki, göstərilən rəqəmlərin ciddiliyinə baxmayaraq, səhv müalicə nəticəsində zərər çəkənlər milli səhiyyə sisteminin hər il xidmət etdiyi çox böyük sayda xəstələrin çox az hissəsidir.
Bölmənin digər xəbərləri
