Bakı, 30 avqust, AZƏRTAC

İdman tarixində eyni anda iki və daha artıq idman növü üzrə peşəkarlaşmış oyunçuların sayı barmaqla sayılacaq qədər azdır.

AZƏRTAC Beynəlxalq Futbol Tarixi və Statistikaları Federasiyasının (IFFHS) rəsmi saytına istinadən xəbər verir ki, dünya tarixində həm futbol, həm də buzüstü xokkeylə peşəkar səviyyədə məşğul olmuş cəmi 10 idmançı var. Onlar idmanın hər iki növü üzrə müxtəlif mükafatlara layiq görülüblər.

Belə idmançılardan biri Arvid Yurgendir. O, futbol və xokkeydən əlavə, basketbolda özünü sınayıb. 1905-ci ildə Latviyada anadan olan Yurgen idmançı karyerasına 1924-cü ildə futbolla başlayıb. Elə həmin ildə üç dəfə Latviya liqasının, iki dəfə isə Riqa Kubokunun qalibi olub. 11 il bu növdə özünü göstərən futbolçu ümumilikdə 38 oyun keçirib. 1932-ci ildən hokkeylə peşəkar səviyyədə məşğul olmağa başlayan idmançı 16 matçda meydana çıxıb. O, beşqat Latviya çempionudur. Yurgen basketbolda da titulsuz qalmayıb və 1925-ci ildə “Riqas”ın heyətində ölkə çempionluğunu bayram edib.

Sven Berqkvist hər iki idman növü üzrə İsveç milli komandalarında çıxış edib. Futbol karyerasına 1935-ci ildə başlayan idmançı 35 oyun keçirib. Hokkey idman növü üzrə həm öz ölkəsində, həm də Avropada kifayət qədər tanınıb. Dünya çempionatlarında və 1936-cı ildə keçirilmiş Qış Olimpiya Oyunlarında ümumilikdə 55 dəfə yığmanın formasını geyinib. Berqkvist 1999-cu ildən Beynəlxalq Hokkey Federasiyasının (IIHF) Şöhrət Zalının üzvüdür.

Robert Sadovski rumıniyalı keçmiş futbolçudur. O, ölkəsinin millisində 5 oyun keçirib. 1938-ci ildə Fransada keçirilmiş dünya çempionatının iştirakçısı olmuş Sadovski Kubaya qarşı qrup mərhələsinin matçında meydana çıxıb. Bu, onun turnirdəki yeganə görüşü olub. 1937-ci ildən 1947-ci ilədək hokkeylə peşəkar şəkildə məşğul olan idmançı bu növdə 10 oyun keçirib.

Rumıniyalı Mihay Flamaropol ilk dəfə 12 yaşında “Qloriya Buxarest” komandasında futbol oynamağa başlayıb. 5 il sonra - 17 yaşında isə özünü buz hokkeyində sınamağa qərar verib. 35 yaşında futbolla, bundan 5 il sonra isə hokkeylə vidalaşıb. O, futbolçu karyerası ərzində 118 matçda 48 qol vurub.

Flamaropolun həmyerlisi Andrey Barbulesku peşəkar futbolçu kimi cəmi 3, hokkeyçi kimi isə 1 dəfə meydana çıxıb. 1938-ci il dünya çempionatının iştirakçısı olub və mundialda 1 oyun keçirib.

Vsevolod Bobrov SSRİ-nin ən yaxşı futbolçu və hokkeyçilərindən biri hesab olunur. Hokkey üzrə Olimpiya, ikiqat dünya, üçqat Avropa və altıqat SSRİ çempionudur. Futbolçu kimi isə 3 dəfə SSRİ çempionatını, 2 dəfə isə SSRİ Kubokunu qazanıb. Karyerasını başa vurduqdan sonra hər iki idman növü üzrə məşqçi kimi fəaliyyət göstərib. Rusiya buz hokkeyi tarixində onun adı karyerası ərzində 250-dən çox qol vuran oyunçular siyahısına daxil edilib.

Sven Tumba 1950-1960-cı illərdə İsveçin ən tanınmış hokkeyçilərindən biri olub. O, həmçinin su xizəyi üzrə İsveç çempionu olub. Ölkəsini hokkeylə yanaşı, futbolda da uğurla təmsil edib. 1997-ci ildən IIHF Şöhrət Zalının üzvüdür. 1999-cu ildə Peter Forsberq və Mats Sundin kimi güclü oyunçuları geridə qoyaraq, bütün zamanların ən yaxşı İsveç hokkeyçisi mükafatına layiq görülüb. 1959-cu ildə hokkey üzrə İsveç çempionu olan Tumba 186 qolla hələ də yığmanın ən sərrast oyunçusudur. O, qolfla da məşğul olub və ölkəsini beynəlxalq yarışlarda təmsil edib.

Vlastimil Bubnik çexiyalı buz hokkeyçisi və futbolçusu olub. 1964-cü il hokkey üzə Qış Olimpiya Oyunlarında bürünc medal qazanaraq IIHF-nin Şöhrət Zalına daxil olmağı bacarıb. Futbolçu karyerası ərzində 103 oyuna çıxan universal idmançı 32 qol vurub. 1957-1960-cı illərdə keçmiş Çexoslovakiya millisinin heyətində 11 oyun keçirib və 4 dəfə fərqlənib.

Teppo Rastio 1985-ci ildən Finlandiya Hokkey Şöhrət Zalının üzvüdür və bu növdə 106 oyun keçirib. Futbolçu karyerası ərzində 1957/1958-ci illər mövsümündə yüksək liqada iki mövsüm oynayıb. 1958-ci ildə Finlandiya millisinə dəvət alıb və cəmi bir qarşılaşmada forma geyinib.

Rastionun həmyerlisi Timo Nummelin hər iki idman növündə Finlandiya çempionatının qalibi olub. O, həm futbolda (1968), həm də hokkeydə “İlin oyunçusu” (1981) seçilən yeganə finlandiyalıdır. Nummelin hokkey üzrə Finlandiya yığması ilə 8 dünya çempionatında iştirak edib. 1991-ci ildən Finlandiya Hokkey Şöhrət Zalının üzvüdür. O, futbol üzrə yığmaya da dəvət alıb.