HESABAT DÖVRÜNDƏ GÖRÜLMÜŞ İŞLƏRƏ YEKUN VURULMUŞDUR

15.02.2006 [21:46]
Çap et
A⁺ A^-

AZƏRTAC-ın müxbiri xəbər verir ki, fevralın 15-də Saatlıda Cəbrayıl Rayon İcra Hakimiyyəti Başçısı yanında şuranın geniş iclası keçirilmişdir. İclasda rayonun idarə, müəssisə və təşkilatlarının rəhbərləri, sahibkarlar, ictimaiyyətin nümayəndələri iştirak etmişlər. Rayon icra hakimiyyətinin başçısı Mahmud Quliyevin hesabat məruzəsi dinlənilmişdir. Natiq respublikanın 58 şəhər və rayonundakı 2000-dən çox yaşayış məntəqəsində məskunlaşmış 60579 nəfər cəbrayıllının qayğı və problemlərindən ətraflı söz açmışdır. O demişdir ki, Biləsuvar rayonu ərazisində cəbrayıllı məcburi köçkünlər üçün yeni salınmış qəsəbələrdə hesabat dövründə bir sıra idarə və müəssisələr açılmış, hər bir məcburi köçkün ailəsinə 0,71 hektar torpaq sahəsi ayrılmışdır. Ümumiyyətlə, “Azərbaycan Respublikası regionların sosial-iqtisadi inkişafı Dövlət Proqramı”nın qəbulundan bəri fəaliyyəti bərpa olunmuş və yeni yaradılmış müəssisələrdə 712 nəfər işlə təmin olunmuşdur.

Məruzəçi ümummilli lider Heydər Əliyevin siyasi xəttinin layiqli davamçısı Prezident İlham Əliyevin 2004-cü il 1 iyul tarixli “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramının təsdiq edilməsi haqqında” Sərəncamının əhəmiyyətini xüsusi vurğulamışdır. Qeyd etmişdir ki, Dövlət Proqramına uyğun olaraq, 2006-cı ildə Cəbrayıl əhalisi üçün bütün infrastrukturları ilə birlikdə 1858 ailənin yaşayacağı daha 5 qəsəbənin tikintisinə başlanması nəzərdə tutulmuşdur. Natiq bildirmişdir ki, bu qəsəbələr inşa edildikdən sonra Sabirabad və Saatlı rayonlarındakı 3 çadır düşərgəsi və İmişli rayonunda dəmir yolu üzərindəki yük vaqonlarında məskunlaşan cəbrayıllı məcburi köçkünlər oraya köçürüləcəkdir.

Məruzə ətrafında müzakirələrdə rayon prokuroru Salman Səmədov, YAP rayon təşkilatının sədri Arif Fərzəliyev, maliyyə şöbəsi müdiri Famil Balayev, müəllimlər İslam İsmayılov, Rəhim Rəhimov, Vaqif Əliyev, ictimaiyyətin nümayəndələri Camal İsmayılov, Mustafa Səmədov və başqaları çıxış edərək hesabat dövründə görülmüş işlərə münasibət bildirmiş, qarşıda duran vəzifələrdən danışmışlar.

Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov iclasda çıxış edərək, bir sıra məsələləri aydınlaşdırmış, verilən sualları cavablandırmışdır.

Prezidentin İcra Aparatının məsul işçisi Rəhim Məmmədov iclasda iştirak etmişdir.

Sonda Azərbaycan Prezidenti İlham Əliyevə müraciət qəbul olunmuşdur.