Bakı, 10 fevral, AZƏRTAC

Azərbaycan Ordusunun qoşun növləri, birlik, birləşmə, hərbi hissə və xüsusi təyinatlı təhsil müəssisələrində 2023-cü il “Heydər Əliyev İli” çərçivəsində keçirilən tədbirlərdə Ulu Öndər Heydər Əliyevin hər bir azərbaycanlı üçün örnək olan mənalı ömür yolu və zəngin irsi dərindən öyrənilir. Vətən müdafiəçilərinin görkəmli dövlət xadimi Heydər Əliyevin ideyaları, eləcə də milli-mənəvi dəyərlər əsasında tərbiyə olunması işinə ciddi fikir verilir.

Ulu Öndər Heydər Əliyev Azərbaycan gənclərinə müraciət edərək deyərdi: “Siz Azərbaycanın bu günü və gələcəyisiniz. Sizin üzərinizə böyük vəzifələr düşür. Bu vəzifələr gələcəkdə daha da böyük olacaqdır. Siz müstəqil Azərbaycanı XXI əsrdə yaşadanlarsınız, quranlarsınız, inkişaf etdirənlərsiniz. Biz müstəqil Azərbaycanın taleyini gələcəkdə sizə etibar edəcəyik. Sizə tapşıracağıq. Ona görə də Azərbaycanı, Azərbaycan dövlətini yaşatmaq, inkişaf etdirmək üçün hazır olun!”.

Ölkəmizin gənclərinin mübariz dəstəsinin cəm olduğu Ordumuzun şəxsi heyətinin 70 faizini təşkil edən ordu gəncləri gəncliyimizin böyük hamisi, yolgöstərəni olan unudulmaz Liderimizin ideyalarına həmişə sadiqdirlər və bunu əməli fəaliyyətləri ilə daim doğruldurlar.

Müzəffər Ali Baş Komandan İlham Əliyevin rəhbərliyi ilə 2016-cı ilin Aprel döyüşləri, Günnüt əməliyyatı, İkinci Qarabağ müharibəsi və müharibədən sonra Azərbaycan Ordusunun qazandığı zəfərlərdə sözsüz ki, Ulu Öndərin ideyaları durur.

Heydər Əliyevin düşüncə, fikir, baxış, ümumiyyətlə, ideyalarından ruhlanan Ordumuzun şəxsi heyəti Ümummilli Liderin 100 illik yubileyini döyüş hazırlığında, təhsildə, təlimlərdə, ictimai-siyasi hazırlıq, o cümlədən “Heydər Əliyev irsini öyrənirik” məşğələlər sistemində əldə etdiyi uğur və nailiyyətlərlə qarşılayır.

Öz xalqını zamanın mürəkkəb tarixi siyasi sınaqlarından uğurla çıxarmış və ardıcıl mübarizə apararaq onu yenidən müstəqilliyinə qovuşdurmuş qüdrətli şəxsiyyət olan Heydər Əliyev gənclərin milli ruhda, milli-mənəvi dəyərlər əsasında tərbiyə olunmasına xüsusi önəm verər, milli dəyərlərimizi, milli ənənələrimizi yaxşı bilməyən, tariximizi yaxşı bilməyən gəncləri vətənpərvər hesab etməzdi.

Ulu Öndərə görə, hər bir gənc Azərbaycanın müstəqil gələcəyini təmin etmək üçün Vətəni, ölkəni, torpağı, dilimizi, dinimizi, milli ənənələrimizi sevməlidir. Onları sevə bilməyən adam, onları özü üçün mənəvi əsas edə bilməyən gənc həyatda özünə yer tapa bilməyəcək.

Heydər Əliyev şanlı döyüş tariximizin öyrənilməsinə, görkəmli sərkərdələrimizin, qəhrəmanlarımızın həyat və döyüş yolunun araşdırılmasına, təbliğinə, onların adlarının ədəbiləşdirilməsinə çalışardı. Arzu edərdi ki, atalarımızın, babalarımızın, əcdadlarımızın qəhrəmanlıq ənənələri bu gün də, gələcəkdə də müstəqil Azərbaycanı qoruyub saxlamaqda, onun müstəqilliyini əbədi etməkdə hər bir gənc üçün örnək olsun.

AZƏRTAC xəbər verir ki, bu fikirlər Müdafiə Nazirliyi və Bakı Bələdiyyə Teatrının birgə təşkilatçılığı ilə “Qəhrəmanlıq ənənələrini yaşadırıq!” devizi ilə keçirilən mədəni-kütləvi tədbirlərdə səsləndirilib.

Layihənin müəllifi Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani tədbirdən əvvəl ürək yanğısı ilə çıxış edərək qardaş Türkiyədə baş vermiş zəlzələ nəticəsində çoxsaylı insanın həlak olması ilə bağlı şəxsi heyəti məlumatlandırıb. Azərbaycanın hər zaman olduğu kimi, bu təbii fəlakətin ilk dəqiqələrindən də qardaş Türkiyənin yanında olduğunu, dövlətimizin başçısı İlham Əliyevin rəhbərliyi ilə bütün xalqımızın öz dəstəyini, həmrəyliyini göstərdiyini, Türkiyənin sevincinin sevincimiz, kədərinin kədərimiz olduğunu nəzərə çatdırıb. Dağıntılar nəticəsində həlak olanlara rəhmət, yaralılara şəfalar diləyən tədbir iştirakçıları əyilməz, yenilməz türk xalqının ağrı-acılarına şərik olaraq bu yaranın da tezliklə sağalacağına əminliklərini və həmrəyliklərini bildiriblər.

Polkovnik Vüqar Allacov Azərbaycan-Türkiyə xalqlarının qəhrəmanlıq ənənələrindən, düşmənlərə qarşı birgə mübarizəsindən, müştərək qələbələrimizdən danışıb. Yüz illər öncə bir yerdə olduğumuz kimi, bu gün də bir yerdə olduğumuzu qürurla vurğulayıb.

Bakı Bələdiyyə Teatrının qocaman aktyorları Əməkdar artistlər Tofiq Bayramov və Səmayə Sadıxova xalqımızın haqlı olaraq “Döyüşən teatr” adlandırdığı Bakı Bələdiyyə Teatrının yarandığı ilk gündən bu sənət ocağında çalışdıqlarını və istər Birinci, istərsə də İkinci Qarabağ müharibələri zamanı Vətən müdafiəçilərinə mədəni xidmət göstərməkdən qürur duyduqlarını, Azərbaycan-Türkiyə qardaşlığını, qəhrəmanlıq ənənələrini təbliğ edən tamaşalarda böyük həvəslə iştirak etdiklərini dilə gətiriblər.

Azərbaycanın Milli Qəhrəmanı Çingiz Qurbanova həsr olunan “Çingiz dastanı” tamaşasında baş qəhrəmanın obrazını məharətlə yaradan, bu gün isə görkəmli sərkərdə Həzi Aslanovun obrazı ilə səhnəyə çıxacaq tanınmış aktyor İlqar Musayev qəhrəman obrazlarını ifa etdiyindən böyük şərəf duyduğunu deyib. A.Qurbaninin “Həzi Aslanov xatirələr işığında” pyesi əsasında Bakı Bələdiyyə Teatrı kollektivinin təqdim etdiyi tamaşa əsgər və zabitlərin döyüş ruhunu, qələbə əzmini, vətənpərvərlik hissini daha da coşdurub.

Həzi Aslanov örnək olaraq rəşadətli Azərbaycan Ordusunun qalib əsgərlərinə təqdim edilib.

Ulu Öndər Heydər Əliyevin qeyd etdiyi kimi, Həzi Aslanov öz qəhrəmanlıq, cəsurluq nümunələri ilə Azərbaycan xalqını dünyada tanıtmış şəxsiyyətdir. Həm döyüşçü, həm sərkərdə, general, həm də vətənpərvər bir insan. Vətəninə sədaqətlə, son nəfəsinə qədər döyüşmüş, həlak olmuş həmvətənimiz Həzi Aslanov bizim üçün daim əziz olub və gələcək nəsillər üçün də əziz olacaq.

Hərbi qulluqçulara Bakı Bələdiyyə Teatrının təqdim etdiyi bu əsərdə Həzi Aslanov obrazını tamaşaçılar həm sərkərdə, həm də vətənpərvər bir insan, tabeliyində olan şəxsi heyətə nəinki yalnız komandir, eyni zamanda, ata, qardaş, dost kimi qarşılayıblar.

Tamaşada Həzi Aslanovun müəmmalı ölümü barədə Əməkdar artist Tofiq Bayramovun ifa etdiyi Baqiaşvili - qəhrəmanın şəxsi həkimi və hadisələrin şahidi obrazı vasitəsilə ətraflı məlumat verilib. Azərbaycan xalqını bundan sonra da dost və düşmənini yaxşı tanımaqda həmişə sərvaxt olmağa çağırış edilib.

Şəxsi heyət tamaşanı böyük maraqla və alqışlarla qarşılayıb.

Aktyorlara Quru Qoşunları komandanlığı adından hədiyyələr təqdim olunub.

Tədbirin sonunda müdafiə nazirinin müavini - Quru Qoşunları komandanı general-leytenant Ənvər Əfəndiyev Bakı Bələdiyyə Teatrının yaradıcı kollektivi və təşkilatçılarla görüşüb. Bu kimi tamaşaların şəxsi heyətin mənəvi-psixoloji hazırlığının, vətənpərvərlik hissinin daha da yüksəldilməsində mühüm əhəmiyyət kəsb etdiyini vurğulayan Komandan deyib: “Hələ qədim zamanlardan insanlar öz azadlığı uğrunda qara qüvvələrlə mübarizə etdiyi vaxtlarda təkcə qılınc, ox və topla deyil, həmçinin nəğmə ilə, şeir ilə də silahlanardı. Bədii söz həmişə xalq bahadırlarının, qəhrəmanların, sərkərdələrin və bütün döyüşçülərin əlində qüdrətli silah olub. Bu gün Ordumuz təkcə yüksək texnika ilə deyil, həm də bizim ana Vətənin böyük məhəbbəti ilə silahlanıb. Vətən müharibəsində bizi Qələbəyə aparan həm də xalqımızın sevgisi, məhəbbəti və əsgərlərimizin döyüş ruhunu, vətənpərvərlik hissini daha da yüksəldən siz sənətçilərin mənəvi dəstəyi idi. İnanıram ki, Ulu Öndər Heydər Əliyevin xeyir-duası ilə unudulmaz sənətkarlarımız Amaliya xanım Pənahova və Yusif Muxtarovun yaratdıqları teatr bundan sonra da Azərbaycan əsgərini yeni-yeni zəfərlərə ruhlandıran tamaşalarla sevindirəcək”.