“Heydər Əliyev İli”nə Zəfər bayrağı ilə!” vətənpərvərlik marafonu davam edir
Bakı, 27 dekabr, AZƏRTAC
Paytaxt Bakıdan start götürən “Heydər Əliyev İli”nə Zəfər bayrağı ilə!” adlı vətənpərvərlik marafonunun ilk dayanacağı Gəncə şəhəri olub.
AZƏRTAC xəbər verir ki, “Qələbə marşı”nın sədaları altında mərasim meydanına gətirilən Zəfər bayrağını şəxsi heyət hərarətli alqışlarla qarşılayıb. Rəşadətli Azərbaycan Ordusu, qəhrəman Azərbaycan xalqı və Müzəffər Ali Baş Komandanla bağlı şüarlar səsləndirilib.
Ümummilli Lider Heydər Əliyevin, respublikamızın suverenliyi və ərazi bütövlüyü uğrunda şəhidlik zirvəsinə ucalan Vətən övladlarının xatirəsi bir dəqiqəlik sükutla yad edilib, Dövlət Himni ifa olunub.
Layihənin müəllifi Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani 2023-cü ilə - “Heydər Əliyev İli”nə sayılı günlər qaldığını qeyd edərək, Ulu Öndərin Vətən qarşısında tarixi xidmətləri barədə ətraflı məlumat verib.
Nəzərə çatdırılıb ki, 2023-cü ildə 100 illiyini ümumxalq bayramı kimi qeyd edəcəyimiz Heydər Əliyev böyük siyasi və dövlət xadimi, xalqın şəksiz lideri olaraq hələ sağlığında canlı əfsanəyə çevrilib. Tarixin yetirdiyi görkəmli şəxsiyyətlərdən olan Heydər Əliyevin parlaq siyasi zəkası sayəsində iki əsrin və iki minilliyin qovuşuğundakı Azərbaycan öz milli-mənəvi dəyərlərini qoruyaraq üçüncü minilliyə inamla qədəm qoyub. Heydər Əliyev zəkası bütün sədləri yararaq və qarşıya çıxan bütün çətinliyə baxmayaraq, Azərbaycanı olduqca mürəkkəb dövrün dalğaları arasından salamat çıxarıb, ona həm bölgədə, həm də dünyada layiqli yer qazandırıb.
Vurğulanıb ki, xalqımızın yetirdiyi nadir şəxsiyyətlərdən olan Heydər Əliyev yaşadığı fırtınalı həyatı boyu hər zaman xalqını, Vətənini düşünüb, onun böyük ürəyi Azərbaycanın müstəqilliyinin möhkəmləndirilməsi, doğma xalqının xoşbəxtliyi üçün çırpınıb. Heydər Əliyev dövlət başçısı kimi Azərbaycanı ən çətin anlarda xilas etmək üçün misilsiz fədakarlıqlar göstərib, ölkəsini bəlalardan qurtarmağı bacarıb.
Müasir Azərbaycan Ordusunun yaranmasının, formalaşmasının, qüdrətli bir qüvvəyə çevrilməsinin memarının da məhz Heydər Əliyev olduğunu qeyd edən polkovnik Abdulla Qurbani Ulu Öndərlə bağlı xatirələrini, əbədiyaşar liderin şəxsi heyətlə görüşlərini xatırlayıb.
Quru Qoşunlarının rəhbər heyətinin salamlarını şəxsi heyətə və vətənpərvərlik marafonunun iştirakçılarına çatdıran polkovnik Saleh Kələntərli Heydər Əliyevin baş memarı olduğu müasir Azərbaycan Ordusunun Ulu Öndərin özü qədər inandığı və gələcəyinə böyük ümidlər bəslədiyi Prezident, Müzəffər Ali Baş Komandan İlham Əliyevin rəhbərliyi ilə qalib orduya çevrildiyini, şanlı hərb tariximizə parlaq səhifələr yazaraq dünyanı heyrətə gətirdiyini, 44 günlük Vətən müharibəsində Qarabağ həsrətinə son qoyduğunu, bütün xalqımız kimi qəhrəman Vətən müdafiəçilərinin də Yeni ilə - “Heydər Əliyev İli”nə Zəfər bayrağı altında yeni-yeni uğur və nailiyyətlərlə getdiyini böyük fərəh hissi ilə dilə gətirib.
Hərbi Dəniz Qüvvələrinin zabiti ədliyyə baş leytenantı Rüstəm Əliyevin aparıcılığı ilə təqdim olunan ədəbi-bədii proqram şəxsi heyət tərəfindən alqışlarla qarşılanıb.
Əməkdar artist polkovnik-leytenant Cahangir Qurbanovun bədii rəhbərliyi ilə Həzi Aslanov adına Ordu İdeoloji Mədəniyyət Mərkəzinin yaradıcı kollektivi Ulu Öndərin xatirəsinə həsr edilən mahnı və şeirləri, o cümlədən mədəniyyətimizin böyük hamisi Heydər Əliyevin sevdiyi mahnıları, şeirləri böyük sevgi ilə ifa ediblər.
“Heydər Əliyev İli”nə Zəfər bayrağı ilə!” adlı vətənpərvərlik marafonu keçirilən gün üç aylıq “Gənc əsgərlər kursu”nu uğurla başa vuran müddətli həqiqi hərbi xidmət hərbi qulluqçularının bölgüsü aparılıb. Ertəsi gün onlar xidmətlərini davam etdirmək üçün böyük ruh yüksəkliyi ilə müxtəlif hərbi hissələrə yola salınıblar. Gənc əsgərlər “Heydər Əliyev İli”ndə yeni-yeni Zəfərlərə imza atacaqlarına söz veriblər.
x x x
Quru Qoşunların Gəncə Qarnizonunun digər bir hərbi hissəsində “Heydər Əliyev İli”nə Zəfər bayrağı ilə!” adlı vətənpərvərlik marafonu çərçivəsində keçirilən tədbir də şəxsi heyətin həyatında unudulmaz hadisəyə çevrilib.
Əvvəlcə Heydər Əliyevin hərbi hissənin qərargahı qarşısında ucaldılan büstü ziyarət olunaraq önünə əklil və güllər qoyulub, xatirəsi ehtiramla yad edilib.
Layihənin müəllifi polkovnik Abdulla Qurbani “Mən həmişə fəxr etmişəm, bu gün də fəxr edirəm ki, mən Azərbaycanlıyam!” kəlamı dillər əzbəri olan Ulu Öndərin Vətənə, dövlətə, xalqa həsr olunan mənalı ömür yolundan söhbət açıb, tarixi xidmətləri barədə ətraflı məlumat verib.
Çıxış edənlər Heydər Əliyevin əsasını qoyduğu müasir Azərbaycan Ordusunun tarixi Qələbəsindən söz açıblar.
Qeyd olunub ki, Vətən müharibəsində qazanılan möhtəşəm Qələbə xalqımızın birliyinin, həmrəyliyinin, dövlətimizin iqtisadi gücünün, rəşadətli Azərbaycan Ordusunun əsgər və zabitlərinin şücaətinin, qəhrəmanlığının, fədakarlığının, Müzəffər Ali Baş Komandan İlham Əliyevin sərkərdəlik məharətinin, qətiyyətinin, hücum diplomatiyasının və əlbəttə, Ulu Öndər Heydər Əliyevin ideyalarının, azərbaycançılıq məfkurəsinin qələbəsidir. Vətən müharibəsindən keçən iki ildən çox müddət ərzində ordu quruculuğu sahəsində mühüm islahatlar həyata keçirilib, yeni-yeni hərbi hissələr, şəhərciklər yaradılıb, Ordunun maddi-texniki bazası daha da möhkəmləndirilib. Hərbi təlimlər geniş vüsət alıb, şəxsi heyətin mənəvi-psixoloji hazırlığı, döyüş ruhu daha da yüksəldilib. Müzəffər Ali Baş Komandan İlham Əliyevin hərbi hissələrə vaxtaşırı səfərləri, şəxsi heyətlə səmimi görüşləri, hərbi qulluqçuların sosial şəraitinin daha da yaxşılaşdırılması naminə görülən məqsədyönlü tədbirlər müsbət nəticələrini verməkdədir.
Azərbaycan Ordusunun bölmələri məğlubiyyətlə heç cür barışa bilməyən düşmənin təxribatlarının qarşısını vaxtında və qətiyyətlə alaraq respublikamızın təhlükəsizliyinin keşiyində mərdliklə dayanıblar.
Çıxış edənlər “Heydər Əliyev İli”nin bütün xalqımız və dövlətimizin həyatında olduğu kimi, Azərbaycan Ordusunun həyatında da əlamətdar olacağına əminliklərini bildiriblər.
Zabit Rüstəm Əliyevin aparıcılığı ilə ədəbi-bədii proqram təqdim olunduqdan sonra alqışlar altında Zəfər bayrağı işğaldan azad edilən Xocavənd rayonunun Hadrut qəsəbəsində Azərbaycan Prezidenti, Müzəffər Ali Baş Komandan İlham Əliyevin bir il öncə açılışını etdiyi ilk Əməliyyat Komando hərbi hissəsinə yola salınıb.
Bölmənin digər xəbərləri
