“Heydər Əliyev və Azərbaycanın müdafiə sənayesi” mövzusunda tədbir keçirilib
Bakı, 1 dekabr, AZƏRTAC
“Heydər Əliyev İli” çərçivəsində Xətai Rayon İcra Hakimiyyətinin, Yeni Azərbaycan Partiyası (YAP) Xətai rayon təşkilatının və Müdafiə Sənayesi Nazirliyinin Elmi-Tədqiqat İnstitutunun birgə təşkilatçılığı ilə “Heydər Əliyev və Azərbaycanın müdafiə sənayesi” mövzusunda tədbir keçirilib.
AZƏRTAC xəbər verir ki, tədbir iştirakçıları əvvəlcə Ulu Öndər Heydər Əliyevin institutun həyətindəki büstünü ziyarət edərək önünə qızılgül dəstələri düzüblər.
Tədbirdə müasir müstəqil Azərbaycan dövlətinin qurucusu, Ulu Öndər Heydər Əliyevin və torpaqlarımızın azadlığı uğrunda canlarından keçən Vətən övladlarının xatirəsi bir dəqiqəlik sükutla yad edilib. Azərbaycanın Dövlət Himni səsləndirilib.
Sonra çıxış edən Xətai Rayon İcra Hakimiyyətinin başçısı Rafiq Quluyev Ümummilli Lider Heydər Əliyevin hakimiyyətinin hər iki dövründə ordu quruculuğu sahəsində atılan addımların prioritet olduğunu bildirib. Dahi şəxsiyyətin əsas çağırışlarından biri gənclərin milli ruhda, vətənpərvərlik ruhunda tərbiyə olunması idi.
Bildirilib ki, Heydər Əliyev siyasəti son 20 ildə Prezident, Müzəffər Ali Baş Komandan İlham Əliyev tərəfindən uğurla davam etdirilir.
Diqqətə çatdırılıb ki, Ulu Öndər Heydər Əliyevin ordu quruculuğu sahəsində həyata keçirdiyi islahatların məntiqi nəticəsi Azərbaycan Silahlı Qüvvələrinin dünyanın ən güclü orduları sırasında yer alması, 30 illik işğala son qoyularaq ədalətin bərpası, ərazi bütövlüyümüzün təmin edilməsi, bütün torpaqlarımızda üçrəngli Bayrağımızın dalğalanmasıdır.
YAP Xətai rayon təşkilatının sədri Vüqar Rəhimzadə çıxışında qeyd edib ki, Azərbaycanın hər bir uğuru Ümummilli Lider Heydər Əliyevin adı ilə bağlıdır. Bu günümüzün reallıqlarını müstəqilliyimizin bərpasının ilk illəri ilə müqayisə etdikdə Heydər Əliyev yolunun ölkəmizə qazandırdığı uğurların miqyasının nə qədər böyük, ölçüyəgəlməz olduğunu görürük. Ümummilli Lider 1993-cü ildə xalqın təkidli tələbi ilə hakimiyyətə qayıdışı ilə Azərbaycanı böyük faciələrdən, təhlükələrdən xilas edib.
Vurğulanıb ki, son 20 ildə Ümummilli Lider Heydər Əliyevin siyasi kursunu bütün sahələrdə uğurla davam etdirən Prezident İlham Əliyevin təkmil siyasəti nəticəsində ordu quruculuğunda qazanılan uğurlar Silahlı Qüvvələrimizin 2016-cı ilin Aprel döyüşlərində, 2018-ci ilin Günnüt əməliyyatında, ən əsası tarixi Zəfərimizə yol açan 44 günlük İkinci Qarabağ müharibəsində göstərdiyi qəhrəmanlıqlarda öz əksini tapıb. Təsadüfi deyil ki, bu gün dünyanın aparıcı hərbi məktəblərində xüsusi əməliyyatlar kimi tarixə düşən Azərbaycanın döyüş təcrübəsi öyrənilir, təhlil olunur.
Müdafiə Sənayesi Nazirliyinin Elmi-Tədqiqat İnstitutunun direktoru Mürsəl Əliyev çıxışında Azərbaycan Ordusunun bu gün dünyanın ən güclü 50 ordusu sırasında qərarlaşmasında, dünya hərb tarixinə yeni səhifə yazmasında əhəmiyyətli rol oynayan möhkəm təməlin yaradılmasından, bu istiqamətdə atılan uğurlu addımlardan geniş bəhs edib.
Tədbir çərçivəsində YAP Xətai rayon təşkilatının “Rahib Məmmədov 25” ünvanı üzrə ərazi partiya təşkilatının sədr müavini seçilən İsmayıl Məmmədov, həmçinin gənclər adından çıxış edən Ləman Qurbanova Ulu Öndər Heydər Əliyevin gənclər siyasətindən danışıblar. Onlar bildiriblər ki, bu gün tarixi Zəfərimizin qəhrəmanları Vətən, torpaq sevgiləri ilə vətənpərvərlik məktəbi yaratdılar.
Şəhid Vüsal Rzayevin anası Zəminə Rzayeva, qazi Sahib Əbülfəzli gənclərimizin torpaq, Vətən sevgisindən geniş bəhs ediblər.
Tədbirdə “Rahib Məmmədov 25” ünvanı üzrə ərazi partiya təşkilatında partiyaya yeni qəbul edilmiş 100 nəfərə Yeni Azərbaycan Partiyasının üzvlük vəsiqələri təqdim olunub. Həmçinin YAP Xətai rayon təşkilatının həyatında fəal iştiraklarına görə bir qrup partiya üzvünə Fəxri fərmanlar verilib.
Daha sonra Azərbaycanın müdafiə sənayesi sahəsində atılan məqsədyönlü addımların uğurlu nəticələrini özündə əks etdirən sənədli film nümayiş olunub.
Tədbir bədi proqramla başa çatıb.
Bölmənin digər xəbərləri
