“Heydər Əliyev və Milli Kitabxana” kitabının təqdimat mərasimi olub
Bakı, 4 may, AZƏRTAC
Mayın 4-də Heydər Əliyev Mərkəzində Azərbaycan xalqının Ümummilli Lideri, Ulu Öndər Heydər Əliyevin 100 illik yubileyi münasibətilə Azərbaycan Respublikasının Mədəniyyət Nazirliyinin Milli Kitabxana ilə birgə nəşr etdiyi “Heydər Əliyev və Milli Kitabxana” kitabının təqdimat mərasimi keçirilib.
AZƏRTAC xəbər verir ki, əvvəlcə Ulu Öndər Heydər Əliyevin 1995-ci il iyunun 3-də ilk dəfə Azərbaycan Milli Kitabxanasına gələrkən miniatür kitab sərgisinin açılışında və “Vətənə, dövlətə, xalqa sədaqət andı” kitabının təqdimat mərasimində çıxışı tədbir iştirakçılarının nəzərinə çatdırılıb.
Tədbirin moderatoru, Azərbaycan Mətbuat Şurasının sədri Rəşad Məcid Ulu Öndər Heydər Əliyevin Milli Kitabxanaya etdiyi səfərlərdən, kitabxanaya gəlişi zamanı öz şəxsi kitabxanasından 300 nüsxəyə yaxın kitab hədiyyə etməsindən bəhs edib. R.Məcidin sözlərinə görə, Milli Kitabxananın başlatdığı “Qarabağa kitabla gedək” layihəsini həmin ənənənin davamı olduğunu söyləmək olar.
Mədəniyyət nazirinin müavini Səadət Yusifli bildirib ki, bu gün ölkənin hər yerində Ulu Öndər Heydər Əliyevin 100 illik yubileyi qeyd edilir. Heydər Əliyevin rəhbərlik etdiyi dövrü Azərbaycan Mədəniyyətinin intibahı dövrü hesab etmək olar.
S.Yusifli çıxışı zamanı Ulu Öndərin kitabxanaya etdiyi səfərlərdən bəhs edərək, hər bir səfərin Milli Kitabxana üçün böyük əhəmiyyət daşıdığını və gözəl ənənənin əsasını qoyduğunu vurğulayıb: “Milli Kitabxanada bu gün elektron kataloq və elektron kitabxana inkişaf edir. Heydər Əliyevin qoyduğu ənənələrin davamı olaraq, 2004-cü ildə Prezident İlham Əliyevin imzaladığı sərəncamlarla kitabxanaların kitab təchizatı ilə bağlı məsələlərə xüsusi diqqət yetirilir. Ölkə başçısının müvafiq sərəncamlarına əsasən Azərbaycan dilində latın qrafikası ilə kütləvi nəşrlərin həyata keçirilməsi nəticəsində 6 milyondan artıq kitab çap edilərək kitabxanalara pulsuz paylanılıb. Mədəniyyət Nazirliyinin Milli Kitabxana ilə birgə nəşr etdiyi “Heydər Əliyev və Milli Kitabxana” kitabı xüsusilə əhəmiyyətlidir və Heydər Əliyevin 100 illiyinin məhz Milli Kitabxananın 100 illik yubileyinə təsadüf etməsi isə rəmzi məna daşıyır. İnanırıq ki, Milli Kitabxana növbəti illərdə də vəzifəsinin öhdəsindən layiqincə gələcək”.
AMEA-nın prezidenti, akademik İsa Həbibbəyli çıxışında bildirib ki, təqdim olunan “Heydər Əliyev və Milli Kitabxana” kitabı Heydər Əliyevin kitabxana işi sahəsində professional xidmətlərini görməyə imkan verir. Heydər Əliyev bizim müstəqilliyimizin xilaskarıdır. Məhz onun qayğısı nəticəsində Milli Kitabxananın özəlləşdirliməsinin qarşısı alınıb. Bu kitab, Heydər Əliyevə olan minnətdarlıq duyğusunu ifadə edir. Akademik bu kitabın həmin günlərin və Ulu Öndərin Milli Kitabxanaya olan 4 tarixi səfərinin canlı iştirakçısı olan professor Kərim Tahirov tərəfindən yazılmasının kitabın uğurlu alınmasına təsir edən əsas amillərdən biri olduğunu xüsusi qeyd edib.
Elm və təhsil nazirinin müavini Firudin Qurbanov bildirdi ki, Heydər Əliyevin mədəniyyətə verdiyi diqqətin səbəblərindən biri, onun kitabxanalara, kitaba, mütaliəyə verdiyi dəyərdən başlayır. “Heydər Əliyev və Milli Kitabxana” kitabında Heydər Əliyevin Milli Kitabxana ilə olan əlaqələrindən, onun kitabxanaya etdiyi səfərlərindən bəhs edilir. Bu kitab Heydər Əliyevin 100 illik yubileyinə böyük hədiyyədir.
Azərbaycan Yazıçılar Birliyinin birinci katibi, Xalq yazıçısı Çingiz Abdullayev qeyd edib ki, kitabda Heydər Əliyevlə bağlı çox maraqlı sitatlar və şəkillər yer alıb. Ulu Öndər mədəniyyətə çox böyük dəyər verirdi. Milli Kitabxana millətin sərvətidir. Kitabxananın bu gün çoxlu sayda oxucuları vardır və kitabxananın bugünkü tərəqqisində, uğurlu fəaliyyətində Ulu Öndərin böyük rolu var. Bu cür kitablar mütləq gələcək nəsillər üçün qorunub saxlanmalıdır.
ADU-nun rektoru, akademik Kamal Abdulla, Milli Məclisin deputatı, professor Anar İsgəndərov, AMEA-nın Mexanika və Riyaziyyat İnstitutunun baş direktoru Misir Mərdanov, BDU-nun Kitabxanaçılıq və informasiya fakültəsinin dekanı, dosent Ələmdar Cabbarlı, Naxçıvan Muxtar Respublikasının Bakı şəhərindəki Daimi Nümayəndəliyinin rəhbəri Bəxtiyar Əsgərov çıxışlarında Ulu Öndər Heydər Əliyevin Milli Kitabxanaya olan münasibətindən, “Heydər Əliyev və Milli Kitabxana” kitabının nəfis tərtibatından bəhs ediblər.
Qeyd edilib ki, Heydər Əliyev haqqında çoxsaylı kitablar, məqalələr yazılıb, filmlər çəkilsə də, onun irsi hələ də araşdırılmaqdadır.
Sonda “Heydər Əliyev və Milli Kitabxana” kitabının müəllifi, Milli Kitabxananın direktoru, professor Kərim Tahirov çıxış edərək, bütün tədbir iştirakçılarına təşəkkürünü bildirib.
Qeyd edib ki, bu günlərdə Azərbaycan xalqı tarixi bir günü qeyd edir. Mayın 10-da nəinki Azərbaycanın, eləcə də dünyanın görkəmli və dahi şəxsiyyətlərindən biri olan Ulu Öndər Heydər Əliyevin doğum günüdür. Ümummilli Lider Heydər Əliyev kitaba, kitabxanaya, ədəbiyyata, milli-mənəvi dəyərlərimizə mühüm əhəmiyyət verirdi. Bunun nəticəsidir ki, Ümummilli Liderimiz milli mədəniyyətin ayrılmaz tərkib hissəsi olan kitabxana işinin inkişafı sahəsində xeyli işlər görüb.
K.Tahirov çıxışı zamanı Ulu Öndərlə bağlı qürur duyduğu məqamlardan və xatirələrindən bəhs edib.
Bölmənin digər xəbərləri
