Heydər Əliyevin Azərbaycanın rəhbəri seçilməsi taleyin xalqımıza hədiyyəsidir
Sumqayıt, 13 iyul, Ətrabə Rzayeva, AZƏRTAC
Ümummilli lider Heydər Əliyevin ilk dəfə Azərbaycana rəhbər seçilməsinin 49-cu ildönümü münasibətilə iyulun 13-də Qubadlı Rayon İcra Hakimiyyəti və Yeni Azərbaycan Partiyası (YAP) Qubadlı rayon təşkilatı tərəfindən tədbir keçirilib.
AZƏRTAC xəbər verir ki, YAP Qubadlı rayon təşkilatının binasında təşkil olunan tədbir Ulu Öndərin həyat yolundan bəhs edən videoçarxın nümayişi ilə başlayıb.
Qubadlı Rayon İcra Hakimiyyəti başçısının müavini, YAP rayon təşkilatının sədri Allahverdi Haqverdiyev ulu öndər Heydər Əliyevin 1969-cu il iyulun 14-də Azərbaycan SSR-nin rəhbəri təyin edilməsini taleyin Azərbaycan xalqına hədiyyəsi kimi dəyərləndirib. Qeyd edib ki, bu hadisə ölkəmizin tarixində uzunmüddətli və sürətli inkişafın əsasını qoydu. Sovеt rеjiminin bütün xüsusiyyətlərinə dərindən bələd olan Hеydər Əliyеv Azərbaycanı düşmüş olduğu ağır vəziyyətdən çıxarmaq üçün qətiyyətli addımlar atmağa başladı. Ulu Öndər 1969-1982-ci illərdə milli kadr hazırlığı məsələsinin həllinə, təhsil şəbəkəsinin genişləndirilməsinə, bu sahənin maddi-texniki bazasının möhkəmləndirilməsinə nail oldu.
Bildirilib ki, Hеydər Əliyеv bütün sahələrdə digər sovеt rеspublikaları ilə müqayisədə dəfələrlə gеri qalan, tənəzzülün hökm sürdüyü respublikanı dirçəltmək üçün yorulmadan fəaliyyət göstərib. Ulu öndər Heydər Əliyev Azərbaycanın Ümumittifaq miqyasında geri qalmasının səbəblərini dərindən araşdıraraq, dahiyanə uzaqgörənliklə ölkənin uzunmüddətli, dinamik və hərtərəfli inkişafını təmin edən kompleks proqramlar hazırlatdı və onların icrasına başlandı. Cəmiyyətin sağlam qüvvələrini, mövcud resursları səfərbər edərək respublikanı tərəqqi və inkişaf yoluna çıxardı.
Tədbirdə çıxış edənlər qeyd edib ki, həyatının Moskva dövründə də respublikamızın inkişafına dəstək xalqımızın böyük oğlunun fəaliyyətində prioritet olub. Xalqın təkidli tələbi ilə Azərbaycanda ikinci dəfə siyasi hakimiyyətə gələn Ulu Öndər ölkəmizin ən yeni tarixinin olduqca məsuliyyətli və taleyüklü mərhələsində ölkəni məhv olmaqdan qurtardı.
Məmnunluqla qeyd edilib ki, Heydər Əliyevdən sonra ölkəmizin sürətli inkişafı Ümummilli Liderin ideyalarının həyata keçirilməsinin birbaşa təntənəsi olduğu kimi, həm də onun siyasi varisi Azərbaycan Prezidenti İlham Əliyevin çoxşaxəli fəaliyyətinin nəticəsi kimi dəyərləndirilir. Hazırda regionun lider dövlətinə çevrilən Azərbaycan, dünyanın ən qabaqcıl ölkələri arasında özünə layiqli yer tutub.
Tədbirdə Azərbaycanın inkişafını gözü götürməyən qüvvələrin və onların əlaltılarının Gəncədə törətdikləri təxribatların qarşısının xalq-hakimiyyət həmrəyliyi nəticəsində qətiyyətlə alındığını qeyd edən natiqlər bildiriblər ki, ulu öndər Heydər Əliyevin müəllifi olduğu inkişaf siyasətini daim dəstəkləyən xalqımız Ümummilli Liderimizin layiqli davamçısı, Prezident İlham Əliyevin ətrafında sıx birləşərək onun yürütdüyü siyasi kursu fəal şəkildə dəstəkləyir.
Sonda bir qrup şəxsə YAP Qubadlı rayon təşkilatının fəxri fərmanları və partiya sıralarına yeni qəbul olunanlara üzvlük vəsiqələri təqdim edilib.
Bölmənin digər xəbərləri
