Bakı, 6 may, Ülviyyə Məmmədli, AZƏRTAC

Ümummilli lider Heydər Əliyevin anadan olmasının 92-ci ildönümü ilə əlaqədar mayın 6-da Naxçıvan Muxtar Respublikasının Bakıdakı daimi nümayəndəliyində “Heydər Əliyevin milli dövlətçilik konsepsiyası və Naxçıvanda qəbul olunmuş tarixi qərarlar” adlı “dəyirmi masa” keçirilib.

AZƏRTAC xəbər verir ki, əvvəlcə tədbir iştirakçıları Fəxri xiyabanda ulu öndər Heydər Əliyevin xatirəsini ehtiramla yad edib, məzarı üzərinə gül dəstələri qoyublar.

Görkəmli oftalmoloq alim, akademik Zərifə xanım Əliyevanın da xatirəsi ehtiramla anılıb, məzarı üzərinə tər güllər düzülüb.

“Dəyirmi masa”da çıxış edən daimi nümayəndəliyin rəhbəri Bəxtiyar Əsgərov ulu öndər Heydər Əliyevin son dərəcə zəngin və mənalı həyat yolu və fəaliyyətinin müxtəlif dövrlərindən ətraflı bəhs edib. O qeyd edib ki, hər bir bayramın böyüklüyü ilk növbədə həmin bayramla bağlı olan hadisənin xalqın tarixində tutduğu yer və dövlətin taleyində oynadığı rol ilə ölçülməlidir. Bu baxımdan yanaşsaq ümummilli lider Heydər Əliyevin Azərbaycan tarixindəki yeri nə qədər önəmlidirsə, onun doğum günü də xalqımız üçün bir o qədər böyük bayramdır.

Qeyd edilib ki, Ulu Öndər Azərbaycan tarixində dönüş yaradaraq ölkənin istiqamətini tənəzzüldən tərəqqiyə doğru çevirən şəxsiyyətdir. Heydər Əliyev Azərbaycan tarixində yeganə şəxsiyyətdir ki, doğum günü öz tarixi önəminə görə tamamilə haqlı olaraq milli bayram statusu daşıyır.

Bildirilib ki, xilaskarlıq missiyası Ümummilli Liderimizin genişmiqyaslı fəaliyyətinin birmənalı olaraq əsasını təşkil edib. Heyrətamiz idarəçilik istedadına, mətin iradəyə və misilsiz əzmkarlığa malik Ulu Öndər Azərbaycanda siyasi hakimiyyətə ilk gəlişində ölkəmizi tənəzzül burulğanından çıxararaq “imzalar içində imzası olmayan”, hətta keçmiş SSRİ məkanında belə yaxşı tanımayan respublikamızı qısa vaxt ərzində qabaqcıl və nüfuzlu ölkə səviyyəsinə yüksəldə bildi. Heydər Əliyev siyasətinə, şəxsiyyətinə dərin sədaqət və əzmkarlıq ifadə edilmiş siyasi məktəbin məhz Naxçıvanla birbaşa bağlı olduğunu nəzərə alsaq, şəxsiyyət və torpaq məfhumlarının müqayisəli ifadələrinə bəraət verə, onu təqdir edə bilərik.

Diqqətə çatdırılıb ki, Heydər Əliyevin iti düşüncəsi, uzaqgörən siyasəti və Azərbaycanın milli maraqlarına cavab verən fəaliyyəti onu layiqli bir Azərbaycan övladını - əsl vətəndaş, dərin düşüncə sahibi, Heydər Əliyevə sədaqət məktəbinin öncülü, qanında, canında yaratmaq eşqi çağlayan bir insanı - Vasif Talıbovu Naxçıvan Muxtar Respublikasının Ali Məclisinə sədr seçməyə, ona Naxçıvanın və müstəqil Azərbaycanın inkişafı yolunda geniş fəaliyyət sferası açmağa sövq etdi. 1995-ci il dekabrın 16-da muxtar respublika Ali Məclisinin sədri seçilən Vasif Talıbov ötən dövr ərzində uğurları ilə böyük Heydər Əliyevin seçimində qətiyyən yanılmadığını bir daha sübut etdi. Həmçinin Heydər Əliyevdən sonra Azərbaycan Prezidenti seçilmiş, Ulu Öndərin layiqli davamçısı olan İlham Əliyevin rəhbərliyi ilə ölkəmizin hərtərəfli inkişafının aparıcı simalarından birinə çevrildi.

“Tarix dahi şəxsiyyətin uzaqgörənliyini yenə təsdiqlədi. Bunun üçün elə də böyük vaxt lazım olmadı. Əməli fəaliyyəti, xalqına və Vətəninə məhəbbəti ilə ümumxalq sevgisi qazanan Prezident İlham Əliyev artıq ikinci dövr üçün dövlət başçısı seçildi və bu gün Ulu Öndər tərəfindən qarşıya qoyulmuş vəzifələrin öhdəsindən layiqincə gəlir. Məhz bu uğurlar Prezident İlham Əliyevə xalqın sonsuz rəğbət və hörmətini qazandırdı. Bütün bu uğurların əsasını qoymuş ulu öndər Heydər Əliyevin adı qədirbilən Azərbaycan xalqının qəlbində daim yaşayacaq”, - deyə Bəxtiyar Əsgərov diqqətə çatdırıb.

Azərbaycan Milli Elmlər Akademiyasının vitse-prezidenti, akademik İsa Həbibbəyli “dəyirmi masa”da “Heydər Əliyevin müstəqil dövlətçilik təliminin Naxçıvan dərsləri” adlı məruzə ilə çıxış edib. O bildirib ki, Heydər Əliyev müstəqil Azərbaycan dövlətinin yaradıcısı, həm də Azərbaycanda müstəqil dövlətçilik konsepsiyasının banisidir. Heydər Əliyevin zəkası, müdrikliyi, təcrübəsinin birləşməsi nəticəsində mükəmməl bir dövlətçilik konsepsiyası yaranıb ki, bu, bizim üçün bir qanundur. Bu, həm də digər müstəqillik qazanmış ölkələr üçün mükəmməl modeldir. Ulu Öndərin həyatının Naxçıvan dövründən danışarkən onu qeyd etmək lazımdır ki, Heydər Əliyev kimi görkəmli bir dövlət xadiminin Azərbaycanın KP MK-nın birinci katibi, SSRİ-nin rəhbərlərindən biri olandan sonra Naxçıvana qayıdışı yalnız Azərbaycan xalqının tale işidir. Ermənistanla sərhəddə olan Naxçıvanın qorunub saxlanılması, inkişaf etdirilməsi Ulu Öndərin Azərbaycan dövlətinə ən böyük xidmətlərindən biridir. Onun Naxçıvanda qəbul etdiyi qərarlar öz xarakterinə görə Naxçıvan Muxtar Respublikası ilə yanaşı, ümumazərbaycan xarakterli qərarlardır. Bu qərarlar həm də yeni tarixi şəraitdə Naxçıvanın qorunub saxlanmasına, möhkəmlənməsinə həsr olunan qərarlardır. Azərbaycanın taleyini həll edən, müstəqillik uğrunda mübarizəyə kömək edən bu qərarların nəticələrini biz bu gün açıq-aydın görürük.

Azərbaycan Dövlət Rəssamlıq Akademiyasının rektoru, akademik Ömər Eldarov Ulu Öndərin ölkəmizdə mədəniyyət və incəsənət xadimlərinə göstərdiyi diqqət və qayğıdan danışıb. O bildirib ki, Azərbaycan müstəqilliyini bərpa etdikdən sonra digər sahələr kimi, mədəniyyətimiz də böyük çətinliklər qarşısında qalmışdı. Heydər Əliyevin hakimiyyətə yenidən qayıdışı bütün sahələrdə olduğu kimi, Azərbaycan mədəniyyətinin də tərəqqisinə yeni təkan verdi. Ulu Öndərin hakimiyyəti illərində rəssamlıq, heykəltəraşlıq və memarlıq sənəti sürətlə inkişaf etdi.

Azərbaycan Tibb Universitetinin rektoru, akademik Əhliman Əmiraslanov Heydər Əliyevin ölkəmizdə təhsilin və səhiyyənin inkişafına diqqət və qayğısından danışıb. Bildirib ki, Ulu Öndərin hələ SSRİ-nin tərkibində olduğumuz vaxtlarda Azərbaycanda gördüyü işlər, genişmiqyaslı fəaliyyəti bu gün Azərbaycanın müstəqil bir dövlət kimi yaşamasını təmin edib. Ölkəmizdə hansı sahəyə nəzər salsaq görərik ki, onun əsası Ulu Öndər tərəfindən qoyulub.

Ulu Öndərin tibb, səhiyyə sahəsinə diqqətindən danışan Ə.Əmiraslanov qeyd edib ki, o, hələ 1970-ci illərdə Azərbaycanda yüksək ixtisaslı kadr hazırlığı barədə fikirləşirdi. Onun hələ o dövrdə apardığı siyasətin bu gün nə dərəcədə müdrik bir siyasət olduğunu görürük. Yenidən hakimiyyətə gəldikdən sonra Heydər Əliyev yenə də səhiyyəyə, tibb təhsilinə xüsusi qayğı göstərməyə başladı.

Milli Məclisin deputatları Musa Qasımlı, Qüdrət Həsənquliyev, İrəvan Dövlət Azərbaycan Dram Teatrının direktoru, əməkdar mədəniyyət işçisi İftixar Piriyev, Miniatür Kitab Muzeyinin yaradıcısı və təsisçisi, əməkdar mədəniyyət işçisi Zərifə Salahova və başqaları “dəyimi masa”da çıxış edərək ulu öndər Heydər Əliyevin Azərbaycan xalqı və dövləti qarşısında göstərdiyi tarixi xidmətlərdən danışıblar.