Heyvandarlıqda innovativ yanaşmalara həsr olunmuş dəyirmi masa keçirilib
Bakı, 14 mart, AZƏRTAC
Aqrar Elm və İnnovasiya Mərkəzinin Heyvandarlıq Elmi-Tədqiqat İnstitutunda “Alimlər fermerlərin yanında” layihəsi çərçivəsində “Heyvandarlıqda innovativ yanaşma” adlı dəyirmi masa keçirilib.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildiriblər ki, Türkiyədən gəlmiş mütəxəssislərin iştirakı ilə təşkil olunmuş dəyirmi masada Gəncəətrafı bölgədə heyvandarlıqla məşğul olan fermerlərlə yanaşı müasir aqrokomplekslərin zootexnik, baytar həkimləri də iştirak ediblər. Dəyirmi masada Kənd Təsərrüfatı Nazirliyinin "Heyvandarlığın təşkili və monitorinqi" şöbəsinin müdiri Esmira Lətifova, Aqrar Elm və İnnovasiya Mərkəzinin şöbə müdiri Nicat Nəsirli heyvandarlıq sahəsində nazirlik xətti ilə həyata keçirilən tədbirlər haqqında ətraflı məlumat veriblər.
“Dəyirmi masanın keçirilməsində əsas məqsəd alimlərin fermerlərin yanında olduğunu onlara göstərməkdir. Türkiyədən layihə çərçivəsində gələn qonaqlarımız da buradadır. Həmin mütəxəssislər tərəfindən fermerləri narahat edən problemlər, yem bazasının təşkili, yoluxucu xəstəliklər, onların müalicə-profilaktika tədbirləri, yemlənmə tərtibatı və bu kimi başqa zootexniki yanaşmalar dəyirmi masada müzakirə olundu, fermerlər məlumatlandırıldılar”, - deyə Heyvandarlıq Elmi-Tədqiqat İnstitutunun direktoru Mahir Hacıyev qeyd edib.
Türkiyənin Qafqaz Universitetinin professorları Yavuz Öztürklər və Cihan Kaçar süni mayalandırma, embirion köçürmə texnologiyasının üstünlükləri haqqında geniş çıxış edərək, son illər Heyvandarlıq Elmi-Tədqiqat İnstitutunun təcrübə sahəsində həyata keçirdikləri sınaqlar haqqında sualları cavablandırıblar. “Məqsədimiz burada qoyunçuluq sahəsində inkişafa və məhsuldar cinslərin yetişdirilməsinə kömək göstərməkdir. Xüsusən, məhsuldar cinslər almaq məqsədilə süni mayalanma texnologiyasını inkişaf etdirməyə çalışırıq”, - deyə professor Yavuz Öztürklər bildirib.
Dəyirmi masada alim və mütəxəssislər iri və xırdabuynuzlu heyvandarlıqda tətbiq olunan innovativ metodlar haqqında danışıb, yem bazasının tərtibi ilə bağlı fermerlərə geniş məlumat veriblər.
Qarşılıqlı müzakirələrdə fermerlər onları narahat edən heyvan xəstəlikləri və sair məsələləri diqqətə çatdırıblar. Baytar həkimlər xəstəliklərə qarşı mübarizə tədbirlərinin təşkil olunması, o cümlədən həmin xəstəliklərə qarşı görülən profilaktik metodlar haqqında öz tövsiyələrini veriblər.
Bölmənin digər xəbərləri
