“HİZBULLAH” TƏRƏFDARLARI KOFİ ANNANDAN NARAZIDIRLAR
Annan Livan rəhbərliyi nümayəndələrinin müşayiəti ilə Beyrutun İsrail bombardmanlarının viran qoyduğu cənub rayonlarına gəldikdə, burada onu “Hizbullah” tərəfdarlarının təşkil etdikləri etiraz mitinqi gözləyirdi. Mitinq iştirakçıları əllərində ABŞ və İsrail əleyhinə sözlər yazılmış plakatlar, şeyx Həsən Nəsrullanın portretlərini tutmuş və birağızdan qışqırırdılar: “Kofi Annan Amerikanın agentidir”.
Mitinq iştirakçılarının fikrincə, Annan İsrailin təcavüzünün dayandırılması üçün bütün lazımi tədbirləri görməmiş və beləliklə, əslində, İsraili dəstəkləmişdir.
Annandan narazılıq o dərəcədə böyük idi ki, mitinqçilərdən birinin fikrincə, BMT-nin baş katibinə kütləvi surətdə divan tutulmasının qarşısını ancaq “Hizbullah” rəhbərliyi almışdır.
Xatırladaq ki, Kofi Annan Beyruta Livan rəhbərliyi ilə danışıqlar aparmaq üçün gəlmişdir. Danışıqlarda BMT sülhməramlı qüvvələrinin Livanda yerləşdirilməsi ilə bağlı bəzi məsələlər həll edilməlidir. Beyrut isə Livanın dəniz tərəfdən və havadan İsrailin indiyədək davam etdirdiyi blokadanın dayandırılmasında Annanın köməyinə ümid bəsləyir.
Bölmənin digər xəbərləri
