Hüquq siyasəti və dövlət quruculuğu komitəsinin onlayn iclası keçirilib
Bakı, 7 aprel, AZƏRTAC
Aprelin 7-də Milli Məclisin Hüquq siyasəti və dövlət quruculuğu komitəsinin videokonfrans formatında iclası keçirilib.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a verilən məlumata görə, komitə sədri Əli Hüseynli çıxış edərək Prezident İlham Əliyev tərəfindən təqdim olunmuş Naxçıvan Muxtar Respublikasının Ali Məhkəməsinə və regional apellyasiya məhkəmələrinə hakimlərin təyin edilməsi ilə bağlı 5 məsələnin gündəliyə daxil edildiyini bildirib.
Çıxış edən Məhkəmə-Hüquq Şurasının Aparat rəhbəri Kərəm Mansurov son dövrlərdə Şura tərəfindən görülən işlər və ümumilikdə məhkəmə sistemində həyata keçirilən islahatlar barədə danışıb. O qeyd edib ki, bütün bu islahatlar beynəlxalq təcrübənin - norma və prinsiplərin öyrənilməsi ilə tətbiq olunur. Şura tərəfindən, eyni zamanda, hakimlərin qəbulu, qiymətləndirilməsi, irəli çəkilməsi, elektron məhkəmə sisteminin inkişafı və vətəndaş müraciətlərinə baxılması kimi sahələrdə kompleks tədbirlər həyata keçirilir. Bildirilib ki, hakimlərin irəli çəkilməsi məqsədilə Məhkəmə-Hüquq Şurasının nəzdində Hakimlərin Qiymətləndirilməsi Komitəsi yaradılıb.
Namizədlikləri irəli sürülmüş hakimlərin peşəkarlığı və iş təcrübəsi nəzərə alınaraq, ümumilikdə 16 hakimlə bağlı məsələlərin müzakirəyə təqdim olunduğunu bildirən deputat Nizami Səfərov onlardan 1 nəfərin Naxçıvan Muxtar Respublikası Ali Məhkəməsinə, 3 nəfərin Bakı Apellyasiya Məhkəməsinə, 2 nəfərin Sumqayıt Apellyasiya Məhkəməsinə, 2 nəfərin Şəki Apellyasiya Məhkəməsinə, 4 nəfərin isə Şirvan Apellyasiya Məhkəməsinə təyinatının nəzərdə tutulduğunu diqqətə çatdırıb. Həmçinin vurğulanıb ki, apellyasiya instansiyası məhkəmələrinin 4 hakiminin iş yerlərinin dəyişdirilməsi ilə əlaqədar vəzifədən azad olunması da gündəmdədir.
Sonra deputatlar Kamal Cəfərov və Bəhruz Məhərrəmov ölkədəki məhkəmə-hüquq sisteminin fəaliyyəti ilə bağlı fikirlərini bölüşüb, öz təklif və qeydlərini səsləndiriblər.
Komitə sədri Əli Hüseynli bildirib ki, məhkəmə hakimiyyətində ədalət prinsipləri əsasında gəncləşdirmə prosesi aparılır, təcrübə mübadiləsi həyata keçirilir. O, son dövrlərdə qadın hakimlərin sayının artmasına da xüsusi diqqət çəkib.
Daha sonra gündəlikdəki 5 məsələnin hamısı Milli Məclisin plenar iclasına tövsiyə olunub.
Bölmənin digər xəbərləri
