HÜSNİ MÜBARƏK: İSLAM AMANSIZ HÜCUMA MƏRUZ QALMIŞDIR

25.10.2006 [23:04]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Misir Prezidenti Hüsni Mübarək Qahirədə çıxışı zamanı demişdir ki, İslam aləmi amansız hücumlara, əsassız ittihamlara məruz qalmış, müqəddəs ocaqlar, müsəlmanların əqidəsi təhqir olunmuşdur. Onun sözlərinə görə, ərəb və islam dünyasının yekdilliyi və eyniliyi təhlükə altındadır. Livanda, İraqda, Fələstin ərazilərində və Əfqanıstanda baş verən hadisələr buna sübutdur. Mübarək Fars körfəzi ölkələrində yeni hədələri, Sudan və Somalidə vəziyyəti qarışdırmaq cəhdlərini də diqqətə çatdırmışdır.

Misir lideri demişdir: “Biz yaxşı anlayırıq ki, hansı hədələr və təhlükələrlə üzləşməli oluruq, lakin bu, bizi imanımızdan döndərməyəcəkdir. Biz müqəddəs ocaqlarımızı, eyniliyimizi müdafiə edərək, təhlükələrə sinə gərməyə, hədələri dəf etməyə hazırıq”. O əlavə etmişdir ki, “indi biz müsəlman dövlətlərinin və xalqlarının birləşməsinə həmişəkindən daha çox ehtiyac duyuruq”.

Mübarək vurğulamışdır ki, İslam tez-tez haqsız ittihamlara məruz qalır. Misir lideri demişdir: “İslam irqçiliyi və ekstremizmi qadağan edir. Nasizm və faşizm müsəlman torpaqlarında yaranmamışdır. Çox vaxt müsəlmanlar özləri islam haqqında səhv təsəvvür yaranmasına səbəb olurlar. Məgər biz, müsəlmanlar, islam haqqında səhv mülahizələrə görə qismən məsuliyyət daşımırıqmı?”. Mübarək konfessiyalararası dialoqa və qarşılıqlı hörmətə çağırmışdır.

HÜSNİ MÜBARƏK: İSLAM AMANSIZ HÜCUMA MƏRUZ QALMIŞDIR

MÜƏLLİFLƏ ƏLAQƏ

Bölmənin digər xəbərləri