ICESCO COP28-də mədəniyyət sahəsində iqlimlə bağlı proqramlarını təqdim edib
Bakı, 9 dekabr, AZƏRTAC
İslam Dünyası Təhsil, Elm və Mədəniyyət Təşkilatının (ICESCO) Baş direktoru Salim Əl-Malik Dubayda keçirilən COP28 iqlim sammitindəki çıxışında rəhbərlik etdiyi təşkilatın peyk texnologiyaları və süni intellekt tətbiqləri vasitəsilə uzaqdan zondlamadan istifadə edərək, iqlim dəyişikliklərinin mədəni irs obyektlərinə təsirini izləmək və müəyyən etmək üçün mexanizm yaratmaq təşəbbüsü irəli sürdüyünü söyləyib. O, həmçinin ICESCO-nun İslam dünyası ölkələrindəki bir sıra arxeoloji obyektlərdə və muzeylərdə karbon izlərinin ölçülməsi və karbon istehsal edən materialların istifadəsinin azaldılması təşəbbüsünü açıqlayıb.
Dekabrın 8-də 20-dən çox ölkədən mədəniyyət və irs sektorundan nazirlər və rəsmilərin, müvafiq beynəlxalq təşkilatların rəhbərlərinin iştirakı ilə Dubayda İqlim Dəyişikliyi üzrə sammitdə (COP28) iqlim fəaliyyətində mədəniyyət sektorunun oynadığı əsas rolu müzakirə etmək və mədəniyyətin iqlim fəaliyyətinə inteqrasiyasını nəzərdən keçirmək üçün geniş diskussiya aparılıb.
AZƏRTAC təşkilatın mətbuat xidmətinə istinadla xəbər verir ki, Salim Əl-Malik bu tədbirdəki çıxışında ekoloji təhlükələr, iqlim dəyişiklikləri də daxil olmaqla və artan təbiət çağırışları nəzərə alınmaqla, mədəniyyətin və bəşər irsinin qorunmasının əsas prioritet olduğunu təsdiqləyib, ICESCO tərəfindən mədəniyyətin 18-ci SDG (Davamlı İnkişaf Məqsədi) kimi qəbul edilməsi təklifinin irəli sürüldüyünü qeyd edib.
Baş Direktor, həmçinin təşkilatın mədəniyyət obyektlərinin və mədəni irsin qorunması üzrə təşəbbüslərini və səylərini vurğulayıb, ICESCO-nun iqlim dəyişikliyinin irs obyektlərinə təsiri ilə mübarizə üçün fond yaratmaq təşəbbüsü irəli sürdüyünü qeyd edib. Təşəbbüs “Mədəniyyətə əsaslanan İqlim Fəaliyyəti” haqqında Şarm Əl-Şeyx Bəyannaməsi ilə nəticələnən COP27-də yüksək səviyyəli nazirlər dialoqunda bəyənilib.
Salim Əl-Malik bildirib ki, “Mədəniyyət üzrə İqlim Fəaliyyətinin Dostları” qrupunu işə salmaq məqsədi ilə COP28-də “Mədəniyyətə əsaslanan İqlim Fəaliyyəti”nə yekun vurulur. O, sonda ICESCO-nun bəşər irsinin qorunması üçün bu çərçivədə daim fəal tərəfdaş olacağını vurğulayıb.
Bölmənin digər xəbərləri
