“İÇƏRİŞƏHƏR” DÜŞÜNDÜRƏN FİLMDİR

18.02.2004 [22:45]
Çap et
A⁺ A^-

Azərbaycan Kinematoqrafçılar İttifaqında 1998-ci ildə çəkilmiş qısametrajlı “İçərişəhər” sənədli filminə retrospektiv baxış keçirilmişdir. Baxışdan əvvəl təşkil olunmuş mətbuat konfransında filmin rejissoru Ziya Şıxlinski bildirmişdir ki, burada hər birimiz üçün vacib olan bir mövzuya - tarixi sərvətlərimizin mühafizəsi məsələsinə toxunulur.

Filmin çəkildiyi vaxtdan beş il keçsə də mövzu aktuallığını bu gün də itirməmişdir. Prezident Heydər Əliyevin “Bakı şəhərində İçərişəhər tarix-memarlıq qoruğunun mühafizəsi və bərpası ilə bağlı bəzi tədbirlər haqqında” 2003-cü il 18 fevral tarixli Sərəncamı əcdadlarımızın bizə miras qoyduqları bu nadir abidədə tikinti aparılmasını qadağan edir. Lakin bəzi fəal işbazları heç bir qüvvə dayandıra bilməmişdir.

Cəmi 8,5 dəqiqəlik bu film insanı kədərli düşüncələrə qərq edir. Üzeyir Hacıbəyovun “Koroğlu” operasından uvertüranın sədaları altında tamaşaçı İçərişəhərdə ucaldılmış yeni “qəsr”ləri əks etdirən kadrları görür.

Filmin ingilis dilində titrlərində deyilir: “Bakı orta əsrlərdə belə olmuşdur. Bəs, bizə qalanları necə saxlamalı?”

Bu film həyəcan siqnalıdır, onun məqsədi ictimaiyyətin diqqətini, nəhayət, bu problemi necə həll etmək məsələsinə cəlb etməkdir.

Filmin prodüseri Dnepropetrovskda yaşayan həmyerlimiz Zübeyr Bəhlul oğlu, operatoru isə Yuri Varnavskidir.