IDEA “Yaşıl söhbət klubu” layihəsi çərçivəsində növbəti görüş keçirib
Bakı, 27 fevral, AZƏRTAC
Gənclərin ekoloji məsələlərə cəlb edilməsi və onların ətraf mühitin mühafizəsinə töhfə vermələri, ekoloji problemlərlə mübarizəyə qoşulmaları naminə irimiqyaslı layihələr həyata keçirən IDEA İctimai Birliyi (İB) “Yaşıl söhbət klubu” (“Green Conversation Club”) layihəsi çərçivəsində növbəti görüş keçirib.
Görüş IDEA İB-nin Azərbaycan Respublikasının Prezidenti yanında Dövlət İdarəçilik Akademiyasında yerləşən Resurs Mərkəzində 30 nəfərə yaxın gəncin iştirakı ilə baş tutub.
İB-dən AZƏRTAC-a bildirilib ki, klubun növbəti görüşü inşaat tullantılarının təkrar istifadəsi və emalı mövzusuna həsr olunub. Gənclər ətraf mühitin mühafizəsi naminə təbiət resurslarından qənaətlə istifadə, tullantıların idarə edilməsi və azalması ilə bağlı geniş fikir mübadiləsi aparıblar.
ABŞ-ın Azərbaycandakı səfirliyinin nümayəndəsi klubun xüsusi qonağı qismində çıxış edərək mövzu ilə bağlı təqdimat keçirib, öz fikir və təcrübələrini gənclərlə bölüşüb.
Görüş gəncləri tullantıların azaldılması, çeşidlənməsi və təkrar emalı kimi proseslərdə iştiraka təşviq etmək baxımından əlamətdar olub.
IDEA İctimai Birliyi “Yaşıl söhbət klubu” layihəsinə gənc ekoloqların ətraf mühitlə bağlı biliklərini və onların ingilis dili səviyyələrini təkmilləşdirmələri məqsədi ilə 2012-ci ilin iyun ayında start verib. “Green Conversation Club” ilk gündən ətraf mühit və davamlı inkişaf sahələrində təhsil alan tələbə və gənc mütəxəssislərin ingilis dilində söhbət etdiyi rahat tədris məkanı olub.
Həm ekoloji, həm də ingilis dili biliklərini eyni vaxtda inkişaf etdirmək istəyən şəxslər hər ay ətraf mühitlə bağlı müxtəlif mövzularda “Yaşıl söhbət klubu”na gələ bilərlər. Klubun görüşləri barədə IDEA-nın internet resurslarında (www.ideacampaign.org, www.instagram.com/idea_public_union və https://www.facebook.com/ideacampaign.org) mütəmadi olaraq məlumat veriləcək. Qeydiyyat üçün 012 497-63-16 telefon nömrəsi ilə əlaqə saxlamaq xahiş olunur.
Bölmənin digər xəbərləri
