İƏT-in Baş katibi müqəddəs Ramazan ayının başlanması münasibətilə bəyanat yayıb
Qahirə, 12 aprel, AZƏRTAC
İslam Əməkdaşlıq Təşkilatının (İƏT) Baş katibi Yusif bin Əhməd əl-Osaymin müqəddəs Ramazan ayının başlanması münasibətilə bəyanat yayıb.
AZƏRTAC İƏT-in Ciddədəki baş qərargahının açıqlamasına istinadla xəbər verir ki, Baş katib bütün İslam ölkələrinin xalqlarını və liderlərini müqəddəs Ramazan ayının başlanması münasibətilə təbrik edib.
İslam ölkələrinə və xalqlarına uca Allahdan bərəkət, sülh və əmin-amanlıq arzulayan İƏT-in Baş katibi bütün müsəlmanları COVID-19 bəlasından qurtulmaq üçün dua etməyə, eyni zamanda, pandemiya ilə mübarizədə qoyulan qaydalara əməl etməyə çağırıb. O, bu sahədə insanların sağlam həyat tərzi keçirməsinin, təmizliyə önəm verməsinin, habelə Ramazan ayı boyunca mümkün qədər bir yerə toplaşmamasının və sosial məsafəni qorumasının əhəmiyyətini vurğulayıb.
İƏT-in Baş katibinin bəyanatında, həmçinin deyilir: “Ramazan xoşniyyətlilik, tolerantlıq və insanlar arasında dözümlülük ayıdır. Mən bütün müsəlmanları sığınacaqlarda qalan qardaşlarını, immiqrantları, xüsusən pandemiyadan əziyyət çəkən qardaşlarını unutmamağa, onlara yardım əlini uzatmağa səsləyirəm. Eyni zamanda, qeyri-müsəlman ölkələrində yaşayan müsəlman icmalarını da bu müqəddəs ayda bütün xalqlar üçün nümunə olmağa dəvət edirəm”.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
