İƏT-in Baş Katibliyində Xocalı faciəsi qurbanlarının xatirəsi yad edilmişdir
Bakı, 25 fevral (AZƏRTAC). Fevralın 24-də Səudiyyə Ərəbistanı Krallığının Ciddə şəhərində yerləşən İslam Əməkdaşlıq Təşkilatının baş Qərargahında Xocalı soyqırımının 21-ci ildönümünə həsr olunmuş anma mərasimi keçirilmişdir.
Azərbaycanın Səudiyyə Ərəbistanı Krallığındakı səfirliyindən AZƏRTAC-a verilən məlumatda bildirilir ki, tədbirdə İƏT-in baş katibi Ekmeleddin İhsanoğlu, İslam İnkişaf Bankının (İİB) prezidenti Əhməd Məhəmməd Əli Əl-Mədəni, İƏT Baş Katibliyi və İİB-in məsul əməkdaşları, İƏT-ə üzv dövlətlərin nümayəndələri, Ciddədə fəaliyyət göstərən diplomatik nümayəndəliklərin rəhbərləri, eləcə də burada yaşayan azərbaycanlılar və KİV nümayəndələri iştirak etmişlər.
Tədbirin keçirildiyi zalda Ermənistan-Azərbaycan, Dağlıq Qarabağ münaqişəsi və Xocalı faciəsini əks etdirən ərəb və ingilis dillərində nəşr edilmiş kitablar, Xocalıya həsr olunmuş “İRS (Heritage)” jurnalının sonuncu xüsusi buraxılışı, eləcə də Heydər Əliyev Fondu tərəfindən hazırlanmış “Qarabağ həqiqətləri” və “Xocalı soyqırımı (sənədlər, faktlarda və xarici mətbuatda)” adlı kitabçalar və disklər (CD) iştirakçılara təqdim edilmiş, habelə Azərbaycan və Qarabağın xəritələrini əks etdirən guşə nümayiş edilmişdir.
Tədbiri giriş sözü ilə açan İƏT-in baş katibi E.İhsanoğlu Xocalı faciəsi haqqında danışmış və həmin qətliam zamanı həyatını itirmiş insanların xatirəsini hörmətlə yad etmişdir. Erməni silahlıları tərəfindən törədilmiş bu vəhşiliyi qətiyyətlə pisləyən və qınayan baş katib bildirmişdir ki, İƏT Xarici İşlər Nazirləri Şuralarında qəbul edilmiş müvafiq qətnamələrdə, işğal edilmiş Azərbaycan torpaqlarında dinc əhaliyə qarşı törədilən hərəkətlər insanlıq əleyhinə cinayət kimi qəbul edilmişdir. Eyni zamanda, E.İhsanoğlu Azərbaycanın haqq işində daim Azərbaycan xalqının yanında olduqlarını vurğulamış və bir daha təşkilatın və öz şəxsi dəstəyinin hər zaman davam edəcəyini ifadə etmişdir.
Azərbaycanın Səudiyyə Ərəbistanı Krallığındakı səfiri və eyni zamanda İƏT yanındakı daimi nümayəndəsi Rasim Rzayev, əvvəlcə dünya müsəlman xalqları arasında birlik və həmrəylik yaradan, onların problemlərinin həlli istiqamətində çalışan və hər zaman kömək əlini uzadan İslam Əməkdaşlıq Təşkilatına və onun baş katibinə Azərbaycanın qanlı günlərindən biri sayılan, Dağlıq Qarabağda Xocalı şəhərində törədilən soyqırıma həsr olunmuş tədbirin İƏT Baş Katibliyində keçirilməsinə görə və bu kədərli günümüzü bölüşmək üçün salona toplaşan bütün iştirakçılara təşəkkürünü bildirmişdir.
Səfir çıxışında erməni millətçiləri tərəfindən xalqımıza qarşı aparılmış soyqırımı siyasətinin tərkib hissəsi kimi Xocalıda günahsız əhalinin xüsusi amansızlıqla qətlə yetirilməsindən geniş söhbət açaraq, həmin faciə zamanı qətlə yetirilmiş, itkin düşmüş və girov götürülmüş insanlar haqqında rəqəmləri açıqlamış və xalqımıza qarşı törədilən bu cinayətin erməni millətçiləri və onların himayədarları tərəfindən planlı şəkildə həyata keçirildiyi bildirmişdir. Xocalı soyqırımının törədilməsinə dair qərarın Ermənistan rəhbərliyi tərəfindən qəbul edilməsi haqqında faktların mövcudluğunu vurğulayaraq, bu faciəni törədənlərin bir qisminin müəyyənləşdirilməsi və onların beynəlxalq mühakiməyə cəlb edilməsi məqsədi ilə axtarışın elan edildiyini söyləmişdir.
Çıxışının sonunda səfir Xocalı soyqırımı haqqında həqiqətləri bütün miqyası və dəhşəti ilə dünya ictimaiyyətinə çatdırmağın, bunun Azərbaycan xalqına qarşı həyata keçirilən soyqırımı siyasəti kimi tanınmasına nail olmağın, faciəyə beynəlxalq hüquqi-siyasi qiymət verməyin, onun təşkilatçılarını, ideoloqlarını və icraçılarını cəzalandırmağın insanlığa qarşı yönəlmiş bu cür qəddar cinayətlərin gələcəkdə də təkrar olunmaması üçün mühüm şərt olduğunu vurğulamışdır.
İİB Prezidenti Əhməd Məhəmməd Əli Əl-Mədəni Xocalı faciəsindən dərin kədərləndiyini bildirmiş və faciəni kəskin şəkildə qınayaraq, Azərbaycan xalqı və Hökumətinə daim dəstək olacaqlarını ifadə etmişdir.
Pakistanın Ciddədəki baş konsulu faciəni XX əsrin ən dəhşətli insan qırğınlarından biri kimi qeyd etmiş və Pakistan dövlətinin Azərbaycan ilə həmrəylik nümayiş etdirərək, bu faciənin Pakistan parlamenti tərəfindən soyqırımı kimi tanındığını tədbir iştirakçılarının diqqətinə çatdırmışdır.
Sonra faciədən bəhs edən sənəli film nümayiş edilmişdir.
Tədbirin sonunda isə iştirakçılar “Xocalı uşaqların gözü ilə” adlı rəsm sərgisi, Xocalı soyqırımını əks etdirən və “Xocalıya ədalət!” kampaniyası çərçivəsində Azərbaycanda və dünya ölkələrində İslam Konfransı Gənclər Forumu tərəfindən keçirilmiş tədbirlərdən fotoşəkillər ilə tanış olmuşlar.
Həmçinin Dağlıq Qarabağ münaqişəsi, xüsusilə də Xocalı soyqırımına həsr olunmuş kitab və jurnallar, səfirliyin press-relizi, İKGF Mədəniyyətlərarası Dialoq üzrə əlaqələndiricisi Leyla xanım Əliyevanın təşəbbüsü ilə irəli sürülmüş “Xocalıya ədalət!” beynəlxalq kampaniyasına dair materiallar mərasim iştirakçılarına paylanmışdır.
Bölmənin digər xəbərləri
