Bakı, 11 sentyabr, AZƏRTAC

Avtomatika və robotika sahəsində dünyanın ən nüfuzlu qurumu hesab edilən Avtomatik Nəzarət üzrə Ümumdünya Təşkilatının (IFAC) 18-ci beynəlxalq elmi konfransı sentyabrın 13-dən 15-dək Bakıda təşkil olunacaq. Konfrans “Azərbaycan Robotika və Avtomatlaşdırma” Cəmiyyətinin (ARAS) və Avstriyanın Vyana Texnologiyalar Universitetinin birgə təşkilatçılığı ilə keçiriləcək. ARAS-ın təsisçisi, İstanbuldakı Azərbaycan Birlik Təşkilatının qurucusu, Avstriyada Gənc Azərbaycanlı Peşəkarlar Assosiasiyasının yaradıcısı, texnika üzrə fəlsəfə doktoru Bahadur İbrahimov AZƏRTAC-a müsahibəsində ölkəmizin bu cür mötəbər tədbirə ev sahibliyi etməsinin əhəmiyyətindən danışıb.

- IFAC kimi nüfuzlu təşkilata üzv olmaq ARAS üçün hansı perspektivlər vəd edir?

- Əvvəlcə onu deyim ki, 1957-ci il sentyabrın 12-də Parisdə təsis olunan IFAC 1978-ci ildən Avstriya hökumətinin dəvəti və dəstəyi ilə fəaliyyətini bu ölkənin Laksenburg şəhərində davam etdirir. Avtomatlaşdırılmış idarəetmə və mühəndislik üzrə 49 ölkənin təşkilatlarını özündə birləşdirən IFAC il ərzində onlarla beynəlxalq tədbir keçirir. Hazırda bu qurum robotikanın əsasını təşkil edən avtomatlaşdırma və nəzarət mexanizmləri üzrə dünyada ən nüfuzlu təşkilat hesab olunur.

Avtomatika və robotika sahəsində səmərəli fəaliyyət göstərən ARAS qısa vaxtda müvafiq istiqamətdə bir sıra uğurlara imza ataraq IFAC-ın üzvü seçilib. Bu cür mötəbər qurumun üzvü seçilmək bizim üçün sevindirici hal olmaqla yanaşı, həm də üzərimizə böyük öhdəliklər götürmək deməkdir. Ciddi təşkilatlanma prosesi keçmiş ARAS üçillik yoxlama və namizədlik mərhələsini başa vurduqdan sonra bu il iyunun 7-də IFAC-ın üzvlüyünə qəbul edilib. Bu nüfuzlu quruma üzv seçilməkdə ən başlıca məqsədimiz IFAC-ın tərkibində azərbaycanlı alimlər üçün beynəlxalq konqreslərdə iştirak və çıxış etmək, səs vermək kimi hüquqlara sahibolma imkanları yaratmaqdır. Çünki IFAC alimlərimiz üçün öz potensiallarını nümayiş etdirmək baxımından önəmli platforma ola bilər.

- IFAC-ın növbəti konfransının Bakıda keçirilməsi, sözsüz ki, Azərbaycan elmi üçün mühüm hadisədir. Tədbirin keçirilməsinin əsas məqsədi və gözlənilən nəticələr barədə nə deyə bilərsiniz?

- IFAC-ın 18-ci beynəlxalq konfransının Bakıda keçirilməsinin məqsədi avtomatika və robotika sahəsi üzrə yeni tədqiqat nəticələrini təqdim etmək, ideya-təcrübə mübadiləsi aparmaq üçün tanınmış alim və mütəxəssisləri ölkəmizdə bir araya gətirməkdir. Tədbirdə 37 ölkədən, o cümlədən Azərbaycandan olan tanınmış alimlərlə yanaşı, İFAC-ın prezidenti, Almaniya Elm Fondunun vitse-prezidenti, Ştutqart Universitetinin professoru Frank Allgover də iştirak edəcək. Zənnimcə, bu cür nüfuzlu konfransın ölkəmizdə təşkil edilməsi alimlərimiz üçün böyük imkanlar açacaq. Onu da bildirim ki, konfransda iştirakın ödənişli olmasına baxmayaraq dünyanın müvafiq sahə üzrə tanınmış alimləri bu tədbirə qatılmağa böyük həvəs göstərirlər. Belə ki, konfransda iştirak üçün 370-dən çox alimin həmmüəllifi olduğu 200 məqalə toplanılıb. Bu da konfransın əhəmiyyətindən, dünyada avtomatika və robotika sahəsinə olan maraqdan xəbər verir. Tədbir üçün seçilən məqalələr nüfuzlu impakt faktorlu jurnalları nəşr edən “Elsevier” nəşriyyat evi tərəfindən toplu halında çap olunacaq. Konfransa qatılacaq alimlər əmindirlər ki, tədbirdə dinləniləcək məruzələr, müzakirə olunacaq mövzular, təqdim ediləcək yeni kəşflər onların elmi fəaliyyətinə müsbət təsir göstərəcək. Bu məqamları nəzərə alaraq, ARAS azərbaycanlı alimlərin konfransda iştirakları üçün ödənişi öz üzərinə götürüb. Bunu etməkdə əsas məqsədimiz alimlərimizin avtomatika və robotika sahəsinə olan maraqlarını artırmaq, onlara tədqiqatlarının nəticələrini dünyanın tanınmış alimləri ilə müzakirə etməyə və dünyanın məşhur elm adamları ilə əlaqə qurmağa şərait yaratmaqdır. IFAC-ın Bakıda ilk və son toplantısı 1980-ci ilin aprelində ulu öndər Heydər Əliyevin səyləri nəticəsində akademik Vadim Trapeznikovun elmi rəhbərliyi ilə keçirilib. Otuz səkkiz ildən sonra bu nüfuzlu beynəlxalq konfransa yenidən Bakının ev sahibliyi etməsi olduqca əlamətdar hadisədir.

- Konfransda aparılacaq müzakirələr hansı mövzuları əhatə edəcək?

- Tədbir avtomatik idarəetmənin texnika, iqtisadiyyat, robotika, tibb, sosial həyat və siyasət ilə əlaqəsini özündə əks etdirir. Konfransda “Kiçik və orta sahibkarlıq üzrə avtomatlaşdırma”, “Mexatronik sistemlər və robotlar”, “Bio-tibbi sistemlər”, “Avtomatlaşdırma və nəzarət mexanizmləri”, “Humanoid robotlar” və digər mövzularda təşkil olunacaq sessiyalarda alimlər ən yeni nailiyyətləri barədə məruzə edəcək, müzakirələr aparacaqlar. Bundan başqa, tədbirdə IFAC-ın texnologiya, mədəniyyət və beynəlxalq sabitlik komitəsinin 35 illik yubileyi qeyd olunacaq.

Konfrans çərçivəsində tədbir iştirakçılarının Azərbaycanın tarixi və görməli yerlərinə ekskursiyaların təşkili də nəzərdə tutulub. Məqsəd ölkəmizi təbliğ etmək, Azərbaycan həqiqətlərini dünyanın tanınmış alimlərinin diqqətinə çatdırmaqdır. Fürsətdən istifadə edərək tədbirin təşkilinə görə bizə daim dəstək göstərən Xarici İşlər Nazirliyi, Təhsil Nazirliyi, Nəqliyyat, Rabitə və Yüksək Texnologiyalar Nazirliyi, Azərbaycan Milli Elmlər Akademiyası, Bakı Limanı, xarici ölkələrdəki səfirliklərimiz, “ADA” Universiteti, Bakı Ali Neft Məktəbi, Avstriya QHT-ləri və ali təhsil ocaqlarına minnətdarlığımı bildirirəm.