IFC Azərbaycan Fintex Assosiasiyası ilə iqtisadi artımı dəstəkləmək əzmindədir
Bakı, 25 yanvar, AZƏRTAC
Azərbaycanın maliyyə sektorunda müasir texnologiyalardan istifadə edərək səmərəli xidmətlər göstərməyə kömək etmək niyyəti ilə Beynəlxalq Maliyyə Korporasiyası (IFC) ilə Azərbaycan Fintex Assosiasiyası arasında anlaşma memorandumu imzalanıb.
IFC-dən AZƏRTAC-a bildirilib ki, tərəflər fintex şirkətlərinin böyüməsinə və ölkədə daha az xərclə, sürətli və keyfiyyətli xidmətlər göstərmələrinə yardım etməklə həmin şirkətlər üçün çərçivənin gücləndirilməsi istiqamətində çalışacaqlar.
Memoranduma uyğun olaraq IFC-nin “İnteqrasiyalı maliyyə və rəqəmsal maliyyə xidmətləri” layihəsi çərçivəsində fintex şirkətləri üçün qabaqcıl beynəlxalq təcrübə əsasında bilik və bacarıqların artırılmasının əsasının qoyulması və təlimlər istiqamətində vebinarlar keçiriləcək. IFC-nin prioritetlərindən biri əhalinin maliyyə xidmətlərinə çıxışını təmin etməklə bank xidmətlərindən kənarda qalmış əhalinin rəsmi maliyyə sisteminə cəlb olunmasına kömək etməkdir. Bu baxımdan texnoloji innovasiyalar inkişafda olan ölkələrdə maliyyə xidmətlərinə çıxışı yaxşılaşdırmaq və maliyyə inklüzivliyini artırmaq üçün səmərəli vasitələrdən biridir.
“Fintex innovasiyaları maliyyə xidmətləri üçün fiziki maneələri azaldır. Maliyyə xidmətlərinin insanların yaşadıqları və işlədikləri yerlərə yaxınlaşdırılması tədbirləri maliyyə inklüzivliyini genişləndirir. Bu, xüsusilə bank filialına getmək üçün xeyli əlavə vaxt və resurs tələb edən ucqar ərazilər üçün daha da önəmlidir. Ölkənin iqtisadi artım trayektoriyasına istinadla, IFC ilə tərəfdaşlığımız Azərbaycanda maliyyə sektorunun dayanıqlılığına töhfə verməklə fintex şirkətlərinin inkişafına kömək etmək məqsədi güdəcək,” - deyə Azərbaycan Fintex Assosiasiyası İdarə Heyətinin sədri Ruslan Talıbov qeyd edib.
Azərbaycan hökumətinin prioritetlərindən biri dayanıqlı, inklüziv özəl təşəbbüslərə əsaslanan iqtisadi artımı sürətləndirməkdir. Fintex texnologiyaları maliyyə xidmətlərinin maya dəyərini azaltmaqla bu məqsədə mühüm mənada töhfə verə bilər. Texnoloji innovasiyalar əsasında yaradılmış yeni alətlər (məsələn, bulud-əsaslı xidmətlər) maliyyə xidmətlərini daha sürətli və səmərəli şəkildə göstərməyə transformasiya etməklə əməliyyat xərclərini azaldır.
“Fintex sarsıdıcı texnologiya olaraq maliyyə inklüzivliyini artırır, inkişafda olan ölkələrdə sürətli iqtisadi artım və müştərək rifah üçün zəmin yaradır. Ümidvarıq ki, Azərbaycan Fintex Assosiasiyası ilə tərəfdaşlığımız maliyyə xidmətləri göstərilməyən və az göstərilən əhaliyə bu xidmətlərə çıxışı təmin edəcək məsuliyyətli və innovativ həlləri dəstəkləməyə, ölkədə fintex şirkətlərinə maliyyə xidmətlərinin çatdırılması yollarını müasirləşdirməyə kömək edəcək,” - deyə IFC-nin Avropa üzrə regional direktoru Rana Karadşeh bildirib.
Qeyd edək ki, son onillikdə Azərbaycan hökuməti, ölkənin maliyyə infrastrukturunu təkmilləşdirmək üçün İsveçrənin İqtisadi Məsələlər üzrə Dövlət Katibliyi SECO ilə tərəfdaşlıqda IFC-nin tövsiyə etdiyi bir sıra tənzimləyici islahatları həyata keçirib. IFC-nin dəstəyi ilə qəbul olunmuş “Açıq bankçılıq yol xəritəsi”, maliyyə sektorunun iştirakçıları və fintex şirkətləri üçün fərdi və biznes müştərilərinə göstərilən innovativ rəqəmsal maliyyə xidmətlərini genişləndirmək yolunda mühüm addımdır.
Bölmənin digər xəbərləri
