II RAMZES SƏS-KÜYLÜ QAHİRƏNİ TƏRK ETDİ
XIX əsrin axırlarında Memfisdə arxeoloji qazıntılar zamanı aşkarlanan bu abidə son 50 ildə Misir paytaxtının mərkəzi meydanlarından birini – II Ramzesin adını daşıyan meydanı bəzəmişdir. Lakin təxminən 3200 il əvvəl yaradılan qranit abidə çoxmilyonlu şəhərin mərkəzində yol hərəkətinin, havanın çirklənməsinin zərərli təsirinə məruz qalırdı. Bundan başqa, alimlər ondan da ehtiyatlanırdılar ki, heykəlin ucaldığı meydan metro qatarlarının əmələ gətirdiyi vibrasiyaya görə deformasiya ola bilər.
Yarım əsr əvvəl abidəni Memfisdən Qahirəyə gətirərkən onu səkkiz hissəyə bölmüşdülər. Lakin hündürlüyü 11 metr, çəkisi 83 ton olan heykəli indi Cizəyə bütöv şəkildə aparmaq qərara alınmışdır. Abidəni xüsusi metal qutuya dikinə qoyaraq, özüyeriyən iki platformaya yükləmişlər. Onun təzə yerə aparılması kimi nadir əməliyyatı Misir televiziyası canlı yayımlamışdır. 30 kilometrlik yol boyunca bu əməliyyatı minlərlə sakin və çoxsaylı turistlər maraqla izləmişlər.
II Ramzesin heykəli Cizə ehramı yaxınlığında yeni muzeyin eksponatı olacaqdır. Muzeyi 5 ildən sonra açmaq planlaşdırılır.
Bölmənin digər xəbərləri
