CƏMİYYƏT
İl ərzində 46 min kubmetrdən çox oduncaq tədarük edilib
Bakı, 14 oktyabr, AZƏRTAC
“İlin ötən dövrü ərzində 46 min 636 kubmetr oduncaq tədarük edilib”.
AZƏRTAC xəbər verir ki, bunu Meşələrin İnkişafı Xidmətinin rəsmisi Sadiq Salmanov bildirib.
Onun sözlərinə görə, qışa hazırlıq məqsədilə qazlaşdırılmayan kəndlərin əhalisinin, Müdafiə Nazirliyinin, Sərhəd və Daxili Qoşunların hərbi hissələrinin, təhsil, səhiyyə müəssisələrinin odun yanacağı ilə təmin olunması üçün oduncaq tədarükü davam edir. İlin ötən dövrü ərzində 46 min 636 kubmetr oduncaq tədarük edilib. Həmin prosesdə şəffaflığın təmin olunması, ictimai nəzarətin həyata keçirilməsi məqsədilə QHT nümayəndələrinin, rayon sakinlərinin və ictimai fəalların iştirakı ilə respublikanın bütün rayonlarında may ayından etibarən ictimai dinləmələr keçirilib və oduncağın tədarük edildiyi meşə əraziləri (meşəbəyilik, dolay, kvartal) barədə nazirliyin rəsmi sosial şəbəkə hesablarında əvvəlcədən ictimaiyyətə geniş məlumat verilib”.
Xidmət rəsmisi bildirib ki, bu və digər məsələlərlə bağlı ətraflı məlumat əldə etmək istəyən şəxslər yaşadıqları rayonlara müvafiq olaraq Regional Meşə Təsərrüfatı mərkəzlərinə müraciət edə bilərlər.