İLİN SONUNADƏK BAKIDA AŞPA-NIN İKİ TƏDBİRİ KEÇİRİLƏCƏKDİR
Milli Məclisin beynəlxalq münasibətlər və parlamentlərarası əlaqələr daimi komissiyasının sədri, AŞPA-dakı Azərbaycan nümayəndə heyətinin rəhbəri Səməd Seyidov AZƏRTAC-ın müxbirinə demişdir ki, Azərbaycanla Avropa Şurası arasında əlaqələr daha da genişlənir və ölkəmiz bu mötəbər qurumda etibarlı mövqelərə malikdir. Milli Məclisin deputatları qurumda çox fəaldırlar və Avropada, eləcə də dünyada mövcud olan problemlərin həlli ilə bağlı müxtəlif məruzələr hazırlayırlar. Bu sənədlərdən biri də AŞPA-dakı nümayəndə heyətimizin üzvü Rəfael Hüseynovun hazırladığı “Avropa jurnalistika universiteti” adlı sənəddir. Bu məruzə ilə bağlı AŞPA-nın elm, təhsil və mədəniyyət komitəsi nəzdindəki mətbuat üzrə alt komitənin noyabrın 29-30-da Bakıda keçiriləcək iclasında müzakirələr aparılacaqdır. Müzakirələrdə komitə üzvləri ilə yanaşı, bir sıra mütəxəssislərin iştirakı da gözlənilir. Alt komitənin həmin iclasında jurnalistlər üçün treninqlərlə əlaqədar ayrıca müzakirələrin təşkil edilməsi də qərara alınmışdır.
S.Seyidovun sözlərinə görə, ilin sonuna qədər paytaxtımızda Avropa Şurası Parlament Assambleyasının daha bir tədbiri də keçiriləcəkdir. AŞPA-nın Siyasi Komitəsinin üzvləri dekabrın 11-12-də Bakıda tolaşacaqlar.
Bölmənin digər xəbərləri
