Bakı, 2 iyun, Əsəd Məmmədov, AZƏRTAC

İyunun 2-də Bakıda Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin təşkilatçılığı ilə Avropa İttifaqının Şərq Tərəfdaşlığı proqramının “Demokratiya, qabaqcıl idarəçilik və sabitlik” üzrə birinci platformasının “Dövlət islahatları paneli”nin X iclası keçirilib.

AZƏRTAC xəbər verir ki, tədbirdə panelin fəaliyyət istiqamətləri üzrə Şərq Tərəfdaşlığı ölkələrində görülmüş işlər, dövlət idarəetməsi, dövlət xidmətlərinin göstərilməsi, elektron hökumət və məlumatların mühafizəsi, dövlət qulluğu, yerli və regional idarəçilik kimi məsələlər müzakirə olunub.

İclasin sədri, Şərq Tərəfdaşlığı proqramının rəhbərinin müavini Nils Canson deyib ki, Bakıda keçirilən X iclas böyük əhəmiyyət kəsb edir. Bu tədbir gələcək işlərin planlaşdırılması baxımından yaxşı fürsətdir, həmçinin nailiyyətlərimiz barədə danışmaq üçün əla imkandır. Tədbirdə müzakirə olunacaq bütün mövzular Şərq Tərəfdaşlığı proqramı üçün çox önəmlidir.

Vurğulanıb ki, Avropa tərəfdaşlığında dövlət idarəçiliyində islahatlara böyük önəm verilir. Dövlət idarəçiliyində islahatlar hər zaman bizim üçün prioritet məsələlərdən olmalıdır. Şərq Tərəfdaşlığı ilə bağlı keçirilən bütün tədbirlərdə bu, vurğulanır.

İclasda çıxış edən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov effektiv, şəffaf dövlət idarəçiliyində islahatların aparılmasının önəmli olduğunu qeyd edib. Bildirib ki, qarşısına inkişafı məqsəd qoyan hər bir dövlət üçün bu, xüsusi əhəmiyyət daşımalıdır. İslahatlar ilk növbədə xalqın, vətəndaşların maraqları nəzərə alınmaqla həyata keçirilməlidir. Həmçinin bu işdə müvafiq dövlət orqanları ilə özəl sektorun da əməkdaşlığı tələb olunur. Bir neçə il bundan əvvəl Azərbaycan Hökuməti də bu məqsədləri müəyyənləşdirdi və Prezident İlham Əliyev tərəfindən dövlət idarəçiliyi sahəsində islahatlar kampaniyası başladıldı. “ASAN xidmət”in fəaliyyətə başlaması da bu islahatların bir hissəsini təşkil edirdi. Azərbaycan hökuməti vətəndaşlara göstərilən xidmətləri təkmilləşdirməyə çalışır. Bunun üçün də innovasiyalardan və müasir texnologiyaların imkanlarından yararlanmağa başlanıldı.

İnam Kərimov vurğulayıb ki, hazırda “ASAN xidmət” mərkəzlərində müxtəlif xidmətlər vətəndaşlara daha rahat və əlverişli şəkildə təqdim olunur. Bu xidmətlər müxtəlif sahələri əhatə edir. Bu günədək “ASAN xidmət”ə 10 milyon müraciət daxil olub. Xidmətlərdən məmnuniyyətlik dərəcəsi 97 faizdir. “ASAN xidmət” 10 dövlət orqanını və 25-dən çox özəl şirkəti əhatə edir. “ASAN xidmət”də 250-yə yaxın xidmət təklif olunur. Agentliyin sədri “ASAN xidməti”ın vətəndaşlara təqdim etdiyi müxtəlif xidmətlər barədə də məlumat verib.

Diqqətə çatdırılıb ki, “ASAN xidmət” tərəfindən, eyni zamanda, müxtəlif sahələrdə, o cümlədən sosial, mədəni, ekologiya sahələrində bir sıra layihələr də reallaşdırılır.

Xarici İşlər Nazirliyinin nümayəndəsi Gündüz Cəfərov bildirib ki, bu cür iclasların keçirilməsi, müzakirələrin aparılması qarşıya qoyulan məqsədlərə çatmaq işinə öz töhfəsini verəcək. Şərq Tərəfdaşlığı proqramının iştirakçısı kimi Azərbaycan müxtəlif mexanizmlər vasitəsilə bu istiqamətdə fəaliyyətini uğurla həyata keçirir. Bu proqram dövlətlər arasında müxtəlif sahələr üzrə əməkdaşlığa da geniş imkanlar yaradır. Həmçinin müxtəlif platformalarda keçirilən iclaslar da bu əməkdaşlıqların genişlənməsinə xidmət edir. Azərbaycan dövlət idarəçiliyinin modernləşməsinə xüsusi diqqət yetirir. Dövlət idarəçiliyində islahatların aparılması işində Azərbaycan yaxşı nəticələrə nail olub. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin yaradılması ölkəmizin bu sahəyə verdiyi önəmin göstəricisidir. Azərbaycanın yaratdığı bu model dövlət idarəçiliyində islahatlar sahəsində dünyaya, eləcə də Avropa İttifaqı ölkələrinə bir nümunə kimi göstərilə bilər.

Avropa İttifaqının Azərbaycandakı nümayəndəliyinin rəhbəri Malena Mard bu iclasın ən müasir təcrübələrin mübadiləsi üçün yaxşı platforma olduğunu deyib. Qeyd edib ki, bu birlikdə fəaliyyət göstərməklə inkişaf üçün çox gözəl imkandır. Dövlət idarəçiliyində islahatların aparılması da bu inkişafa nail olmaq yolunda ən vacib addımlardandır. Bu islahatların aparılması Avropa İttifaqı və onunla tərəfdaş olan ölkələrin inkişafını, rifahını və stabilliyini təmin edəcək.

“Avropa İttifaqının Azərbaycandakı nümayəndəliyi “ASAN xidmət”in fəaliyyətini diqqətlə izləyir. Biz də müxtəlif sahələrdə “ASAN xidmət”lə əməkdaşlıq edirik”, - deyə M.Mard bildirib. O qeyd edib ki, demokratik institutların qurulması üçün dövlət idarəçiliyində islahatların aparılması da çox önəmlidir.

İclasda digər çıxış edənlər də dövlət idarəçiliyi islahatlarının demokratik dövlət quruculuğundakı önəmindən bəhs edib, müxtəlif ölkələrin müvafiq istiqamətdəki təcrübələrini bölüşüblər.

Tədbir işini sessiya, təqdimatlar və müzakirələrlə davam etdirib.