İndoneziya COVID-19-a yoluxan xəstələri Vyetnam qaçqınları üçün düşərgədə yerləşdirəcək
Tokio, 5 mart, AZƏRTAC
İndoneziya hökuməti COVID-19 koronavirusuna yoluxmuş xəstələri Qala adasındakı Vyetnam qaçqınları üçün istifadə edilmiş düşərgədə yerləşdirəcək.
AZƏRTAC “The Jakarta Post” qəzetinə istinadla xəbər verir ki, bu barədə İndoneziya qoşunlarının komandanı aviasiya marşalı Hadi Tyaxcanto məlumat verib. Marşal bildirib ki, həmin adada 1979-1996-cı ildə qaçqınlar üçün istifadə edilmiş binalar hələ də yaxşı vəziyyətdədir. Burada təmiz su və elektrik enerjisi var. Eyni zamanda, həmin ada “Hanq Nadim” beynəlxalq aeroportundan 50 kilometr məsafədə yerləşir.
Marşal qeyd edib ki, bu xəstəxana həm karantin mərkəzi kimi, həm də xəstələrin müalicəsi üçün istifadə ediləcək.
Həmin xəstəxana eyni vaxtda 1000 xəstəni qəbul edəcək və burada izolyasiya olunmuş otaqlar da fəaliyyət göstərəcək.
İndoneziyanın İctimai İşlər və Mənzil Tikintisi naziri Basuki Hadimulcano isə bildirib ki, xəstəxanada bərpa işləri bir ay ərzində başa çatdırılacaq.
Əlavə olaraq qeyd edək ki, İndoneziya Prezidenti Coko Vidodo martın 2-də ölkədə iki nəfərdə yeni koronavirusun aşkar olunduğunu elan edib. Bildirib ki, bu virus o qədər də təhlükəli deyil və digər ölkələrdə ona yoluxanlar müalicə ediliblər. Buna görə də çaxnaşmaya ehtiyac yoxdur və hökumət onun yayılmasının qarşısını almaq üçün lazımi addımları atacaq.
İndoneziyada ilkin olaraq koronavirusla əlaqədar karantin mərkəzi Riau adasındakı Natuna məntəqəsində yaradılıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
