İndoneziya hökuməti müqəddəs Ramazan ayında tətbiq ediləcək məhdudiyyətlərlə bağlı sirkulyar qəbul edib
Tokio, 12 aprel, AZƏRTAC
İndoneziya Prezidenti kabinetinin katibliyi yanında fəaliyyət göstərən COVID-19 üzrə işçi qrup müqəddəs Ramazan ayında koronavirusun yayılmasının qarşısını almaq məqsədilə tətbiq ediləcək məhdudiyyətlər barədə sirkulyar qəbul edib.
AZƏRTAC İndoneziya Prezidenti Kabineti katibliyinin saytına istinadla xəbər verir ki, həmin sənəd mayın 6-dan 17-dək qüvvədə olacaq.
Sənədi şərh edən işçi qrupun rəhbəri bildirib ki, bu sirkulyarın pozulması qanuna müvafiq olaraq cərimələrin, sosial sanksiyaların, azadlıqdan məhrumetmə də daxil olmaqla cinayət məsuliyyətinə cəlb etməni nəzərdə tutur.
Bildirilir ki, sirkulyarın qəbul olunmasında məqsəd cari ildə müqəddəs Ramazan ayında insanların kütləvi şəkildə hərəkətinin qarşısını almaq və bununla da COVID-19-a yoluxma riskini azaltmaqdır.
Əlavə olaraq qeyd edək ki, son məlumatlara görə İndoneziyada koronavirusa yoluxanların ümumi sayı 1 milyon 566 min 995 nəfər təşkil edir. Onlardan 42 min 535 nəfər həyatını itirib. Ümumilikdə 1 milyon 414 min 517 nəfər sağalaraq evlərinə dönüb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
