İnfeksionist: Ölkədə kəskin respirator infeksiyalarına yoluxma sayında artım müşahidə olunur
Bakı, 28 dekabr, AZƏRTAC
Qış aylarında uşaqlar və böyüklər arasında kəskin respirator infeksiyasına yoluxma hallarında artım müşahidə edilir. Həmin xəstəliklər, adətən, yuxarı tənəffüs yollarının zədələnməsi nəticəsində yaranır. Kəskin respirator virusunun simptomlarına boğaz ağrısı, öskürək, burun tutulması, temperaturun yüksəlməsi, halsızlıq, başağrısı, əzələ ağrıları daxildir.
Bunu AZƏRTAC-ın suallarını cavablandıran Səhiyyə Nazirliyinin mütəxəssis-eksperti, infeksionist Təyyar Eyvazov deyib.
Onun sözlərinə görə, son aylarda ölkədə kəskin respirator infeksiyalarına yoluxma saylarında artım müşahidə olunur: “Bu infeksiyalar xroniki xəstəlikləri və immun sistemi zəif olan insanlarda müəyyən fəsadlar yarada bilər”.
Respirator xəstəliklərindən qorunma yollarından danışan T.Eyvazov qeyd edib ki, infeksiyadan qorunmaq üçün əhalinin sıx toplaşdığı yerlərdə maskadan istifadə etmək, sosial məsafəni gözlənmək, gigiyena qaydalarına əməl etmək vacibdir: “Valideynlər bu simptomları müşahidə etdikləri uşaqlarını məktəbə göndərməməlidir. Xəstənin vəziyyətindən asılı olaraq həkimə müraciət etmək tövsiyə olunur”.
İnfeksionist insanların immun sistemini gücləndirmək üçün düzgün qidalanmalı olduğunu bildirib: “İnsanlar qida rasionunlarına mövsümi meyvə və tərəvəzləri əlavə etməlidir. Eyni zamanda havanın temperaturuna uyğun geyinmək tövsiyə edilir”.
Bölmənin digər xəbərləri
