İNFORMASİYA KAMPANİYASI KEÇİRİLƏCƏKDİR
Kənd Təsərrüfatı Kreditləri üzrə Dövlət Agentliyindən AZƏRTAC-a daxil olmuş məlumatda bildirilir ki, Azərbaycan hökuməti Kənd Təsərrüfatının İnkişafı və Kreditləşməsi Layihəsini həyata keçirmək məqsədi ilə Beynəlxalq İnkişaf Assosiasiyasından kredit almışdır. Agentlik həmin kreditin müəyyən hissəsini “Südlük maldarlıqla məşğul olan təsərrüfatlarda damazlıq işinin təşkili” mövzusunda informasiya kampaniyasını icra edə biləcək qeyri-hökumət təşkilatı və ya özəl şirkətlə imzalanacaq müqavilə üzrə istifadə etmək niyyətindədir. Bu məqsədlə keçiriləcək müsabiqədə iştirak etmək istəyən qeyri-hökumət təşkilatlarından və ya özəl şirkətlərdən damazlıq-seleksiya və süni mayalanma işlərinin təşkili üzrə ən azı 5 illik iş təcrübəsinə, eləcə də həmin sahələr üzrə bilikli və təcrübəli mütəxəssislərə malik olmaq tələb olunur.
Kampaniya üzrə zəruri informasiya materialları, televiziya, radio və dövri mətbuat, seminarlar və digər tədbirlər vasitəsilə Naxçıvan, Gəncə, Şəki, Beyləqan və Masallı Regional Məsləhət Mərkəzlərinin əhatə etdiyi rayonlarda 4 ay müddətində yayımlanacaqdır.
