“İpək Yolu” II Beynəlxalq musiqi festivalı çərçivəsində “Kontrabas” monotamaşası göstərilmişdir
Bakı, 30 iyun (AZƏRTAC). İyunun 30-da “İpək Yolu” II Beynəlxalq musiqi festivalı çərçivəsində Azərbaycan Dövlət Gənc Tamaşaçılar Teatrında “Kontrabas” monotamaşası göstərilmişdir.
AZƏRTAC xəbər verir ki, alman yazıçı-dramaturqu Patrik Züskindin “Kontrabas” pyesi əsasında səhnələşdirilən tamaşada kontrabasçı rolunu Əməkdar Artist Şövqi Hüseynov ifa etmişdir. Tamaşanın quruluşçu rejissoru, səhnə və musiqi tərtibatçısı Xalq Artisti İrina Perlovadır.
Tamaşa iştirakçılar tərəfindən maraqla qarşılanmışdır.
Qeyd edək ki, alman yazıçısı, dramaturqu və kinossenaristi Patrik Züskindin “Kontrabas” monopyesinin qəhrəmanı ensiklopedik biliyə və yüksək intellektə malik peşəkar musiqiçi, əsl sənət fədaisidir. O, iki böyük ülvi məhəbbət hissi arasında çırpınır: bir tərəfdən, bütün ömrünü həsr etdiyi sevimli aləti kontrabasa, musiqi sənətinə olan sonsuz məhəbbəti, digər tərəfdən isə kontrabasçı kimi çalışdığı opera teatrının müğənnisi, mezzo-soprano Saraya qarşı yeni yaranmış çılğın eşqi.
Öz kontrabası ilə sanki canlı insan - dostu, övladı, həmdəmi kimi söhbət edən, xəyalən səsini eşitdiyi sevgilisi ilə danışan, uşaqlıq xatirələri, ambisiyaları və uğursuzluqları, dahi müəllimləri və musiqiçilərin kölgələri ilə “dərdləşən” qəhrəman daim özünü faciəvi situasiyalara düçar edir. Onu özünü dərk etməyə aparan yol da elə budur.
Bölmənin digər xəbərləri
