Qətərdə Heydər Əliyevin 103-cü ildönümü böyük ehtiramla anılıb
Qahirə, 10 may, AZƏRTAC
Azərbaycanın Qətərdəki səfirliyində xalqımızın Ümummilli Lideri Heydər Əliyevin anadan olmasının 103-cü ildönümü münasibətilə tədbir keçirilib.
AZƏRTAC xəbər verir ki, tədbirdə Azərbaycan səfirliyinin əməkdaşları, diaspor fəalları iştirak ediblər.
Əvvəlcə tədbir iştirakçıları Ulu Öndərin portreti önünə gül çələngi qoyublar.
Səfir Adış Məmmədov Ümummilli Lider Heydər Əliyevin Azərbaycan xalqı qarşısındakı misilsiz xidmətlərindən və dövlət quruculuğu sahəsindəki fəaliyyətindən danışıb. O bildirib ki, Heydər Əliyev müstəqil Azərbaycanın memarı olaraq ölkədə demokratik cəmiyyətin formalaşmasına, sabitliyin bərqərar olunmasına və davamlı inkişafın təmin edilməsinə mühüm töhfələr verib.
Səfir vurğulayıb ki, Azərbaycanın ən mürəkkəb dövründə – 1993-cü ildə xalqın təkidli tələbi ilə hakimiyyətə qayıdan Ulu Öndər dövlət müstəqilliyini və suverenliyini qoruyaraq ölkəni ağır böhrandan çıxarıb. O qeyd edib ki, Heydər Əliyev dünyada bütün azərbaycanlıları vahid ideya – azərbaycançılıq məfkurəsi ətrafında birləşdirməyə nail olub.
Diplomat bildirib ki, Ümummilli Lider Heydər Əliyevin ən böyük arzularından biri Azərbaycan torpaqlarının Ermənistanın işğalından azad olunmasını görmək idi. Ulu Öndər buna inanırdı və bu gün onun ruhu şaddır, çünki Prezident, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu 30 ilə yaxın davam edən işğala son qoyaraq tarixi ədaləti bərpa edib, ölkəmizin ərazi bütövlüyü və suverenliyini tam təmin edib.
Səfir, həmçinin işğaldan azad olunmuş ərazilərdə həyata keçirilən bərpa və quruculuq işlərindən danışıb. Diqqətə çatdırılıb ki, Prezident İlham Əliyevin rəhbərliyi ilə Qarabağ və Şərqi Zəngəzurda genişmiqyaslı yenidənqurma layihələri icra olunur, keçmiş məcburi köçkünlərin doğma torpaqlarına mərhələli, könüllü və təhlükəsiz qayıdışı təmin edilir.
Eyni zamanda, qeyd olunub ki, Azərbaycanın yerləşdiyi mürəkkəb geosiyasi şəraiti nəzərə alan Ümummilli Lider Heydər Əliyevin uzaqgörən siyasəti nəticəsində ölkəmizin müstəqil siyasi və iqtisadi inkişaf kursu müəyyənləşdirilib. Vurğulanıb ki, bu strateji xətt Azərbaycanın uzunmüddətli sabitliyinin və davamlı inkişafının əsasını təşkil edib.
Bildirilib ki, Ulu Öndərin siyasi kursu bu gün Prezident İlham Əliyev tərəfindən uğurla davam etdirilir. Prezident İlham Əliyevin məqsədyönlü siyasəti və peşəkar idarəçiliyi nəticəsində Azərbaycan regionun güclü və nüfuzlu dövlətlərindən birinə çevrilib, beynəlxalq münasibətlər sistemində mövqeyini daha da möhkəmləndirib.
Qeyd olunub ki, əldə olunan bu uğurlar hər bir Azərbaycan vətəndaşında böyük qürur hissi doğurur.
Tədbirin sonunda iştirakçılar Ümummilli Lider Heydər Əliyevin həyat və fəaliyyətindən bəhs edən sənədli filmə baxıblar.
Bölmənin digər xəbərləri
