İQLİMİN İSTİLƏŞMƏSİ TAUN XƏSTƏLİYİNİN YAYILMASINA SƏBƏB OLUR
AZƏRTAC xarici KİV-lərə istinadla xəbər verir ki, hazırda müşahidə edilən iqlim dəyişmələri taun xəstəliyinə tutulma hallarının çoxalmasına gətirib çıxara bilər. Bunu beynəlxalq kollektivin apardığı və “ABŞ Milli Elmlər Akademiyasının dinləmələri”ndə dərc olunmuş tədqiqatın nəticələri göstərir. Alimlər diqqəti Qazaxıstan üzərində cəmləşdirmişlər, çünki, onların məlumatlarına görə, orada bu xəstəlik gəmiricilər arasında geniş yayılmışdır. Eyni zamanda, tədqiqat göstərmişdir ki, yazda ümumi orta temperaturun cəmi bir dərəcə yüksəlməsi bu rayonda taun xəstəliyinin yayılmasının 59 faiz artmasına gətirib çıxarır. Bu isə adamların da xəstələnməsi riskini xeyli artırır.
Hazırda taun xəstəliyi ciddi problemdir: hər il Asiya, Afrika, Cənubi Amerika ölkələrində və ABŞ-da 3 min nəfərin bubonlu tauna yoluxması haqqında məlumat verilir. Buna görə də alimlər ümid edirlər ki, onların işinin nəticələri nəzərə alınacaq və hökumət orqanları bu xəstəliyin kökünü kəsmək üçün lazımi tədbirlər görə biləcəklər.
Bölmənin digər xəbərləri
