İQTİSADİ ƏMƏKDAŞLIQ MƏSƏLƏLƏRİ ÜZRƏ AZƏRBAYCAN-UKRAYNA BİRGƏ HÖKUMƏTLƏRARASI KOMİSSİYASININ İCLASI KEÇİRİLMİŞDİR
Yaqub Eyyubov iclası açaraq bildirdi ki, indiki görüş Ukrayna Prezidenti Viktor Yuşşenkonun ölkəmizə səfəri ərəfəsində keçirilir. Bu səfər ikitərəfli münasibətlərin möhkəmlənməsi yolunda mühüm mərhələ olacaqdır.
Andrey Klyuyev isə vurğuladı ki, Azərbaycan Ukraynanın strateji tərəfdaşı olmuşdur və olaraq qalır. Onun sözlərinə görə, əmtəə dövriyyəsi həcminin ildən-ilə artması iki ölkə arasında qarşılıqlı surətdə faydalı iqtisadi əməkdaşlığa inandırıcı misaldır. 2006-cı ilin birinci yarısında əmtəə dövriyyəsinin həcmi 113,2 milyon dollar təşkil etmişdir.
İclasda qeyd olundu ki, Azərbaycandan Ukraynaya əsasən aqrar sənaye, yanacaq-energetika və kimya kompleksləri, habelə maşınqayırma məhsulları göndərilir. Ölkəmiz Ukraynadan qara metallurgiya, maşınqayırma, elektrotexnika, ərzaq məhsulları alır. Azərbaycanda Ukrayna kapitalının iştirakı ilə 76 firma və subyekt qeydiyyata alınmışdır.
İclasda yanacaq-energetika, nəqliyyat, rabitə və humanitar sahələrdə Azərbaycan-Ukrayna əməkdaşlığının perspektivləri nəzərdən keçirildi. Xəzər neftinin Odessa-Brodı boru kəməri ilə nəqlinin və bu kəmərin Baltik və Şimal dənizlərinin limanlarınadək uzadılmasının, Ukraynaya neft məhsulları göndərilməsinin mümkünlüyü müzakirə edildi. Gələn il Azərbaycanda Ukrayna mədəniyyəti günləri, 2008-ci ildə Ukraynada Azərbaycan mədəniyyəti günləri keçirilməsi haqqında razılaşma əldə olundu.
İclasın yekunlarına əsasən protokol imzalandı.
Bölmənin digər xəbərləri
