İran parlamenti: ABŞ-la danışıqlar yalnız əvvəlcədən müəyyən edilmiş şərtlərlə mümkün ola bilər
Bakı, 16 iyul, AZƏRTAC
İran parlamenti ABŞ-la nüvə proqramı üzrə danışıqların yenidən başlaması üçün əvvəlcədən müəyyən edilmiş şərtlərin irəli sürülməsini vacib hesab edir.
AZƏRTAC xəbər verir ki, müvafiq tələb İran parlamentinin üzvlərinin bəyanatında yer alıb.
“ABŞ danışıqları İranı aldatmaq və İsrailin həyata keçirdiyi hücumu informasiya pərdəsi ilə ört-basdır etmək üçün aparıb. Bu səbəbdən danışıqları əvvəlki şərtlərlə aparmaq mümkün deyil. Danışıqlara yalnız əvvəlcədən irəli sürülən şərtlər yerinə yetirildikdən sonra başlamaq olar”, - deyə bəyanatda bildirilir.
Qeyd edək ki, 2025-ci ilin aprelindən başlayaraq İran və ABŞ Tehranın nüvə proqramı ətrafında yaranan vəziyyətin həlli üçün dolayı danışıqlar aparırdılar. Tərəflər Omanın vasitəçiliyi ilə yeni razılaşma əldə etmək üçün bir neçə cəhd göstərib, lakin uranın zənginləşdirilməsi məsələsindəki fikir ayrılıqları səbəbindən proses dalana dirənib.
Danışıqların növbəti raundu iyunun 15-də Omanın paytaxtı Maskatda keçirilməli olsa da, ABŞ və İsrailin İrana qarşı həyata keçirdiyi hücumlar səbəbindən baş tutmayıb. Dialoqdan imtina etmədiyini bir daha bəyan edən Tehran bunun üçün ABŞ-dan təcavüzün təkrarlanmaması ilə bağlı zəmanət tələb edib.
Bölmənin digər xəbərləri
