İran XİN: Milli maraqlarımız nəzərə alınarsa, ABŞ ilə danışıqların bərpası mümkündür
Bakı, 20 iyul, AZƏRTAC
İran Xarici İşlər Nazirliyinin və danışıqlar prosesində nümayəndə heyətinin sözçüsü İsmayıl Bəqai brifinq zamanı bildirib: “Milli maraqlarımız nəzərə alınarsa, ABŞ ilə danışıqların bərpası mümkündür”.
AZƏRTAC İran mediasına istinadla xəbər verir ki, Bəqai paytaxt Tehranda keçirdiyi həftəlik mətbuat konfransında jurnalistlərin suallarını cavablandırıb.
O, vasitəçi ölkələrin İrana müəyyən mesajlar çatdırdığını bildirib və deyib: “Əgər milli maraqlarımız nəzərə alınarsa, ABŞ ilə danışıqların yenidən başlaması mümkündür. “Danışıqlar və ya müharibə, diplomatiya, yaxud hərb” dilemması ölkəmizə fayda vermir. İran öz maraqlarını bəzən müdafiə vasitələri ilə, bəzən də diplomatiya yolu ilə qoruyur”.
XİN sözçüsü Hörmüz boğazı ilə bağlı İranın bu ərazidə suverenliyinin danışıqlara açıq olmadığını bildirib və əlavə edib: “Gördüyümüz tədbirlərlə Hörmüz boğazı üzərində suverenliyi bərqərar etmək əzmindəyik. Hörmüz boğazının İranın milli təhlükəsizliyini təhdid etmək üçün istifadə edilməsinə icazə verməməliyik”.
Bəqai İran ilə ABŞ arasında imzalanan anlaşma memorandumunun müddəalarının şərhə açıq olmadığını və Vaşinqtonun öz öhdəliklərini pozması üçün heç bir bəhanə görmədiyini bildirib. O, ABŞ-nin öhdəliklərini yerinə yetirmədiyi təqdirdə İranın da adekvat cavab verəcəyini bir daha təkrarlayıb.
İranın daxili işlər naziri İsgəndər Möminin Pakistana səfərinə toxunan Bəqai bildirib ki, ancaq iki ölkənin rəsmilərinin iştirak edəcəyi görüşlərdə müvafiq nazirliklərin vəzifə və məsuliyyətləri ilə bağlı məsələlər müzakirə olunacaq.
Bölmənin digər xəbərləri
